کراچی (رپورٹنگ آن لائن) گورنر سندھ سید محمد نہال ہاشمی نے یومِ الحاقِ پاکستان کے موقع پر کشمیری عوام کے نام ایک خصوصی پیغام جاری کرتے ہوئے کہا ہے کہ یومِ الحاقِ پاکستان کشمیر کی آزادی اور تکمیلِ پاکستان کا سنگِ میل ہے۔
گورنر سندھ نے تاریخی پس منظر پر روشنی ڈالتے ہوئے کہا کہ 19 جولائی 1947 کو کشمیریوں نے اپنے مستقبل کو پاکستان سے جوڑنے کا تاریخی فیصلہ کیا تھا، جو کشمیری رہنماؤں کے دوقومی نظریہ پر غیر متزلزل ایمان کا عکاس ہے۔ انہوں نے کہا کہ کشمیر پاکستان کی شہ رگ ہے اور وہ دن دور نہیں جب وہاں آزادی کا سورج طلوع ہو کر رہے گا۔سید محمد نہال ہاشمی نے کہا کہ بھارتی ظلم و ستم کشمیریوں کے جذبہ حریت کو کسی صورت دبا نہیں سکتا اور پاکستان کا بچہ بچہ اپنے کشمیری بھائیوں کی حقِ خودارادیت کی جدوجہد میں ان کے ساتھ کندھے سے کندھا ملا کر کھڑا ہے۔
گورنر سندھ نے عالمی برادری کے رویے پر گہری تشویش کا اظہار کرتے ہوئے کہا کہ کشمیر میں جاری انسانی حقوق کی بدترین پامالیوں پر عالمی برادری کی خاموشی لمحہ فکریہ ہے۔ انہوں نے مطالبہ کیا کہ عالمی برادری اقوامِ متحدہ کی قراردادوں کے مطابق مسئلہ کشمیر کو فوری حل کرائے تاکہ خطے میں پائیدار امن قائم ہو سکے۔
