بیجنگ (رپورٹنگ آن لائن) چین اور پاکستان کے درمیان سفارتی تعلقات کے قیام کی 75ویں سالگرہ کے موقع پر بیجنگ کی پیکنگ یونیورسٹی میں دو روزہ بین الاقوامی علمی سیمینار منعقد ہو رہا ہے۔
“ورثہ، جدت اور مشترکہ کامیابی” کے موضوع پر ہونے والے سیمینار کا اہتمام پیکنگ یونیورسٹی کے مرکز برائے مطالعاتِ پاکستان سمیت متعلقہ اداروں نے کیا ہے۔ چین میں پاکستان کے سفیر خلیل ہاشمی سمیت دونوں ممالک کے سفارت کار، ماہرین، اسکالرز اور کاروباری شعبے کے نمائندے سیمینار میں شریک ہیں۔
سیمینار میں چین پاکستان تعلقات کے 75 سالہ سفر کا جائزہ لینے کے ساتھ مستقبل میں عملی تعاون کو مزید وسعت دینے پر تبادلۂ خیال کیا جا رہا ہے۔ شرکا چین پاکستان اقتصادی راہداری کے اگلے مرحلے کے تحت زرعی تعاون، سبز ترقی، صنعتی پارکس، تیسرے فریق کی منڈیوں اور صنعتی تعاون سمیت مختلف شعبوں میں تعاون کے نئے امکانات پر گفتگو کر رہے ہیں۔
موجودہ علاقائی اور بین الاقوامی صورتحال کے تناظر میں دونوں ممالک کے درمیان تزویراتی اعتماد کو مزید مضبوط بنانے کے ساتھ ساتھ تعلیم، زبان، ادب اور عوامی و ثقافتی روابط کو فروغ دینے پر بھی تبادلۂ خیال کیا جا رہا ہے۔
سیمینار میں مصنوعی ذہانت اور نئی ٹیکنالوجی کے دور میں چین اور پاکستان کے درمیان علمی، تعلیمی اور عوامی روابط کو نئی جہت دینے کے امکانات بھی زیرِ بحث ہیں۔
شرکا کا کہنا ہے کہ یہ سیمینار چین پاکستان دوستی کے 75 سالہ سفر کو آگے بڑھانے اور مستقبل کے تعاون کے لیے نئے مواقع تلاش کرنے کا ایک اہم پلیٹ فارم فراہم کرتا ہے۔
