کراچی (رپورٹنگ آن لائن) خیبر پختونخوا میں سپن وام سے دریافت ہونےوالی گیس کا فروخت کیلئے بولی کا عمل مکمل ہوگیا۔
خیبر پختونخوا کے ضلع شمالی وزیرستان کے علاقے اسپن وام میں دریافت ہونے والی گیس کی تجارتی فروخت کی جانب اہم پیش رفت سامنے آئی ہے، ماری انرجیز لمیٹڈ نے گیس کی فروخت کے لیے بولی کا عمل مکمل ہونے کے بعد کامیاب بولی دہندہ کو لیٹر آف ایوارڈ جاری کر دیا۔
پاکستان سٹاک ایکسچینج (پی ایس ایکس) کو بھیجے گئے اپنے اعلامیے میں کمپنی نے بتایا کہ اسپن وام گیس دریافت سے حاصل ہونے والی گیس کی فروخت کے لیے ٹینڈر 15 مئی 2026ء کو جاری کیا گیا تھا، شفاف بولی کے عمل کی تکمیل کے بعد یونیورسل گیس ڈسٹری بیوشن کمپنی کو گیس کی خریداری کے لیے لیٹر آف ایوارڈ جاری کر دیا گیا ہے۔
خط میں لکھا گیا کہ سپن وام گیس فیلڈ سے یومیہ 17.5 ملین مکعب فٹ گیس فروخت کی جائے گی، ماری انرجیز نے واضح کیا کہ گیس کی فروخت اور سپلائی حکومت پاکستان کے 7 جنوری 2025ء کو جاری کیے گئے فریم ورک فار سیل آف گیس ٹو تھرڈ پارٹیزکے تحت کی جائے گی۔
