کوئٹہ (رپورٹنگ آن لائن)وزیرِ اعلی بلوچستان سرفراز بگٹی نے کہا ہے کہ دشمن عناصر بلوچستان کو غیر مستحکم کرنے کی کوشش کرتے ہیں، جو ملک کو تقسیم کرنا چاہتے ہیں وہ احمق ہیں۔
سرفراز بگٹی نے اے ٹی ایف ٹریننگ اسکول کوئٹہ میں 20 ویں ٹریننگ کورس کی پاسنگ آئوٹ پریڈ تقریب سے خطاب کرتے ہوئے کہا کہ صوبے میں امن و امان کی صورتِ حال کچھ بگڑ رہی ہے، ملک میں عجیب سازش ہو رہی ہے۔انہوں نے کہا کہ سیاسی جماعتوں کو کہتا ہوں کہ سیاست کو دہشت گردی سے مت جوڑیں، ریاست کو سیاست کی نہیں، ریاست کو ریاست کی ضرورت ہے۔وزیرِاعلی بلوچستان نے کہا کہ بلوچ قوم کو لاحاصل جنگ کی طرف ڈالا گیا، بلوچ نوجوان نے فیصلہ کر لیا ہے کہ یہ جنگ ایک لاحاصل ہے،
بلوچستان کے لوگ اپنی ریاست کے ساتھ جڑے ہوئے ہیں، اگر آپ راہ حق پر آنا چاہتے ہیں تو ہمارے دروازے آپ کے لیے کھلے ہیں۔انہوں نے کہا کہ اگر آپ بندوق کے زور پر اپنا نظریہ مسلط کرنا چاہتے ہیں تو بھول جائیں کہ ظلم و بربریت کے خلاف ہم سرنڈر کریں گے، دہشت گردی کے خلاف ہم ایک انچ بھی پیچھے ہٹنے کو تیار نہیں، ہم اس صوبے اور ملک کو دہشت گردی سے نکالنے میں کامیاب ہوں گے۔
