اسلام آباد( رپورٹنگ آن لائن) پی ٹی آئی کے سیکریٹری جنرل سلمان اکرم راجا نے دوٹوک کہا ہے کہ بانی پی ٹی آئی معافی نہیں مانگیں گے یہ ناممکن ہے ۔
اسلام آباد میں میڈیا سے گفتگو کرتے ہوئے انہوں نے کہا اگر کوئی سمجھتا ہے کہ عمران خان معافی مانگیں گے تو اپنے ذہن سے یہ بات نکال دے۔سلمان اکرم راجا نے کہا کہ بڑی تحریک کا مطلب اپنے اندر بہت سے معنی رکھتا ہے۔
سیاسی جماعتوں سے بات چیت اچھے انداز میں آگے بڑھ رہی ہے۔پی ٹی آئی رہنما کا کہنا تھا کہ 23 مارچ یوم تجدید والے دن لاہور میں ہمیں کیک تک نہیں کاٹنے دیا گیا۔ یہ صرف آئین وقانون نہیں بلکہ شرافت کی بحالی کا بھی دن ہے۔سلمان اکرم راجا نے مزید کہا کہ آج لارجر بینچ نے بانی پی ٹی آئی سے ملاقاتوں سے متعلق درخواستیں سنیں۔
ہم نے عدالت کو بتایا کہ نومبر کے بعد سے بانی پی ٹی آئی سے ملاقاتیں نہیں ہو رہی ہیں جب کہ ملاقاتیں کرنا عمران خان کا استحقاق بھی ہے۔انہوں نے بتایا کہ عدالت نے واضح کر دیا کہ ہفتہ وار دو ملاقاتیں کروائی جائیں گی۔ ہم عمران خان سے ملاقاتوں سے متعلق اب فہرست دیا کریں گے۔
سلمان اکرم راجا نے کہا ہے کہ ملاقات کرنیوالوں پر شرط عائد ہوئی ہے کہ وہ ملاقات کے بعد سیاسی گفتگو نہیں کرینگے۔ جیل حکام کا موقف ہے کہ رفقا کی گفتگو سے عدم استحکام کا خدشہ ہے۔ کسی بھی شخص کی گفتگو پر تو قدغن نہیں لگ سکتی۔ عدالت نے بات نہ کرنے کا حکم رفقا کی حد تک دیا ہے۔
