اسلام آباد (رپورٹنگ آن لائن)وزیر مملکت بلال اظہر کیانی نے کہا ہے کہ وزیر اعظم محمد شہباز شریف کے جدید اور ڈیجیٹل پاکستان کے وڑن کے مطابق پاکستان کیش لیس معیشت کی طرف مسلسل بڑھ رہا ہے جس کی مدد سے ڈیجیٹل ادائیگی کے نظام کو اپنانے میں اضافہ ہو رہا ہے۔ ایک انٹرویومیں وزیر مملکت بلال اظہر کیانی نے کہا کہ حکومت کے وسیع تر ڈیجیٹل اکانومی ایجنڈہ کے تحت پاکستان کا مالیاتی نظام بتدریج تبدیلی سے گزر رہا ہے اور حکومتیـنجی شعبے کے تعاون سے مارکیٹوں میں کیش لیس لین دین میں مسلسل اضافہ ہو رہا ہے۔
انہوں نے کہا کہ شہری بتدریج ڈیجیٹل ادائیگی کے چینلز کی طرف منتقل ہو رہے ہیں جن میں موبائل والیٹس، آن لائن ٹرانسفرز اور روزمرہ کی خریداریوں کے لیے کارڈ پر مبنی ادائیگیوں کے نظام شامل ہیں جو آسان اور ٹیکنالوجی پر مبنی مالیاتی طریقوں کی طرف تبدیلی کے رویہ کی عکاسی کرتے ہیں۔انہوں نیکہا کہ تاجر اور کاروباری برادری ریٹیل اور ہول سیل شعبوں میں کیش لیس حل کو تیزی سے مربوط کر رہے ہیں جس سے بہتر کارکردگی، زیادہ شفافیت اور قومی معیشت میں ڈیجیٹل ادائیگیوں میں اضافہ ہو رہا ہے۔ وزیر مملکت نے کہا کہ حکومت ادائیگی کے بنیادی ڈھانچے کو وسعت دے کر ملک بھر میں محفوظ اور بغیر کسی رکاوٹ کے لین دین کی حمایت کے لیے نظام کی صلاحیتوں کو بڑھا کر پاکستان کے ڈیجیٹل مالیاتی ایکو سسٹم کو مزید مضبوط کر رہی ہے۔
انہوں نے کہا کہ یہ اقدامات ایک جامع حکمت عملی کا حصہ ہیں جس کا مقصد مالیاتی فریم ورک کو جدید بنانا اور قابل اعتماد، موثر اور شفاف اقتصادی کارروائیوں کو یقینی بنانا ہے۔انہوں نے شاپنگ اور مارکیٹ کی معمول کی سرگرمیوں میں کیش لیس ادائیگیوں کی طرف بڑھتے ہوئے عوامی رجحان کو بھی اجاگر کیا اور زور دیا کہ یہ بڑھتا ہوا رجحان ڈیجیٹل پلیٹ فارمز پر بڑھتے ہوئے اعتماد کو ظاہر کرتا ہے۔انہوں نے نتیجہ اخذ کیا کہ صارفین کے رویے میں یہ مسلسل تبدیلی پاکستان کی مکمل طور پر جدید، کیش لیس ڈیجیٹل معیشت کی طرف منتقلی کو تیز کر رہی ہے۔
