عمران خان

ملکی تباہی کو سمجھنے کیلئے سواتی پر تشدد اور سلمان شہباز کی واپسی کے واقعات کافی ہیں، عمران خان

لاہور(رپورٹنگ آن لائن)پاکستان تحریک انصاف کے چیئرمین عمران خان نے کہا ہے کہ پاکستان کی معیشت تباہی کے نرغے میں کیوں ہے یہ سمجھنے کیلئے اعظم سواتی پر تشدد اور این آر او ٹو کے ذریعے سلمان شہباز کی واپسی جیسے دو واقعات ہی کافی ہیں۔

اپنے ٹویٹس میں عمران خان نے کہا کہ اگر کوئی یہ سمجھنا چاہتا ہے کہ پاکستان کی معیشت تباہی کے نرغے میں کیوں ہے تو اس کیلئے محض دو واقعات ہی کافی ہیں، 75 سالہ سینیٹر اعظم سواتی کو زیر حراست تشدد کا نشانہ بنایا گیا، انہیں ان کے پوتے پوتیوں کے سامنے پیٹا گیا، ایک حصے کو گرا کر ان کے گھر پر جبراً تالے چڑھائے گئے

عمران خان نے کہا کہ قوانین کو مکمل نظر انداز اور انسانی حقوق کو صریحاً پامالی کرتے ہوئے درج کیے گئے درجنوں مقدمات کے ذریعے اعظم سواتی کو ایک سے دوسرے صوبے میں گھسیٹنے کا سلسلہ جاری ہے، اس کے برعکس اربوں روپے کی کرپشن اور منی لانڈرنگ میں ملوث سلمان شہباز نامی ایک اشتہاری کو (این آر او ٹو کے ذریعے) جھاڑ پونچھ کرکے پاک صاف کردیا گیا ہے اور وہ پاکستان لوٹ آیا۔چیئرمین تحریک انصاف نے کہا کہ رسولِ مکرّم ۖ کی وہ حدیثِ مبارکہ ہر کسی کے پیش نظر رہنی چاہیے جس میں انہوں نے خبردار کیا تھا کہ ناانصافی کیسے قوموں کو تباہی سے دوچار کرتی ہے۔