اسلام آباد (رپورٹنگ آن لائن)صدر مملکت آصف علی زرداری نے جمہوریہ کوریا (جنوبی کوریا) کے صدر، لی جے میونگ، جنوبی کوریا کی حکومت اور عوام کو ان کے قومی دن اور یوم آزادی پر مبارکباد کا پیغام دیا۔
صدر مملکت نے اپنے خط میں اس بات کو اجاگر کیا کہ پاکستان جنوبی کوریا کے ساتھ اپنے دوستانہ تعلقات کو انتہائی قدر کی نگاہ سے دیکھتا ہے۔ انہوں نے کہا کہ گزشتہ کئی دہائیوں سے باہمی اعتماد، قریبی تعاون اور دوطرفہ و کثیر الجہتی روابط پر مبنی ان تعلقات میں مسلسل اضافہ ہوا ہے۔
صدر زرداری نے اس اعتماد کا اظہار کیا کہ دونوں ممالک باہمی دلچسپی کے شعبوں بشمول سیاسی روابط، تجارت، سرمایہ کاری اور عوامی سطح پر روابط میں تعاون کو وسعت دیتے رہیں گے۔ انہوں نے کہا کہ وہ دونوں اقوام اور ان کے عوام کے باہمی مفاد کے لیے دوطرفہ شراکت داری کو مزید مضبوط بنانے کے لیے جنوبی کوریا کی قیادت کے ساتھ مل کر کام کرنے کے خواہاں ہیں۔
