اسلام آباد (رپورٹنگ آن لائن) قومی کرکٹ ٹیم کے وکٹ کیپر بیٹسمین کامران اکمل نے کہا ہے کہ لیگ ٹیلنٹ سامنے لانے کا اچھا پلیٹ فارم ضرور ہیں مگر قومی ٹیم کی نمائندگی کے وقت ڈومیسٹک کرکٹ کی کارکردگی کو ہی ترجیح ہونی چاہئے، ان کے مطابق لیگ ٹیلنٹ سامنے لانے کا اچھا پلیٹ فارم ضرور ہے مگر قومی ٹیم کی نمائندگی کے وقت ڈومیسٹک کرکٹ کی کارکردگی ہی ترجیح ہونی چاہئے۔
کرکٹ پاکستان ڈاٹ کام کو انٹرویو میں کامران اکمل نے کہا کہ 5 سال سے ڈومیسٹک کرکٹ میں اچھی کارکردگی کے باوجود مجھے منتخب نہیں کیا جا رہا، بطور بیٹسمین بھی میری ٹیسٹ اور ٹی ٹوئنٹی ٹیم میں جگہ بنتی ہے، ماضی میں کوچز مجھے پسند نہیں کرتے تھے اس لئے باہر رکھا۔
ان کا موقف تھا کہ عمر اکمل کو درست طریقے سے ہینڈل نہیں کیا جا رہا۔ انہوں نے کہا کہ انضمام الحق نے بطور کپتان جس طرح شعیب اختر، محمد آصف اور شاہد آفریدی سے کام لیا اسی طرح موجودہ انتظامیہ کو بھی عمر اکمل کو سنبھالنا چاہئے۔
آف دی فیلڈ ایشوز پاکستانی کرکٹ میں نئی بات نہیں، عمر میں بھی کچھ خامیاں ہوں گی لیکن کسی نے پیار سے سمجھانا نہیں چاہا، کوچ اور کپتان کو علم ہونا چاہئے کہ ایسے باصلاحیت کھلاڑی کو کیسے ڈیل کرنا ہے۔ کامران اکمل نے انگلینڈ جانے والی ٹیم کیلئے نیک خواہشات کا اظہار بھی کیا۔
