اسلام آباد ( رپورٹنگ آن لائن)وفاقی وزیر مواصلات عبدالعلیم خان نے کہا ہے کہ سکھر حیدرآباد موٹرویکی تعمیر کاآغاز آئندہ ماہ ہو جائے گا۔سماجی رابطوں کی ویب سائٹ ایکس پر بیان میں آئندہ ماہ سے سکھر حیدرآباد موٹروے ایم-6 کی تعمیر کے آغاز کی خوشخبری سنا دی ۔
وفاقی وزیر عبدالعلیم خان نے کہا کہ 30 برسوں سے زیر التوا موٹروے کی تعمیر شروع ہونے جا رہی ہے، اللہ تعالی کا کرم ہے کہ ایم-6 جیسے تاریخی منصوبے کو عملی شکل دینے کا موقع مل رہا ہے۔ وفاقی وزیر مواصلات نے کہا کہ ایم-6 موٹروے سندھ سمیت پاکستان بھر میں تجارتی سرگرمیوں کو نئی رفتار دے گی،موٹروے ایم -6 ملک کی معاشی ترقی اور علاقائی رابطوں کے فروغ میں اہم کردار ادا کرے گی۔
وفاقی وزیر نے کہا کہ سکھر حیدرآباد موٹروے کی سنگِ بنیاد کی تقریب میں صدرِ مملکت اور بلاول بھٹو کو خصوصی طور پر مدعو کریں گے۔ انہوں نے کہا کہ وزیراعلیٰ سندھ اور صوبائی کابینہ کے معزز اراکین کو بھی اس تقریب میں شرکت کی دعوت دی جائے گی۔ وفاقی وزیر مواصلات نے کہا کہ موٹروے ایم-6 منصوبہ سندھ اور پاکستان کی ترقی کے لیے سنگِ میل ثابت ہو گا۔
