ممبئی (جیاتی)بھارتی ٹی وی اداکارہ دپیکا ککڑ کی ساتھی اداکارہ جیاتی بھاٹیا نے انکشاف کیا ہے کہ 2018 میں دپیکا نے شعیب ابراہیم سے شادی کی وجہ سے اسلام قبول نہیں کیا تھا بلکہ یہ دپیکا کا ذاتی اور روحانی فیصلہ تھا۔
ایک حالیہ انٹرویو کے دوران جیاتی بھاٹیا نے بتایا کہ میری دوست دپیکا اپنی زندگی کے ایک مشکل دور سے گزر رہی تھیں، اسی دوران دپیکا نے اجمیر شریف کی درگاہ پر حاضری دی جہاں انہیں ذہنی سکون اور حوصلہ ملا، بعد ازاں انہوں نے اپنی مرضی سے اسلام قبول کرنے کا فیصلہ کیا اور اس فیصلے کا شادی سے کوئی تعلق نہیں تھا۔جیاتی کے مطابق دپیکا نے خود مجھے بتایا تھا کہ یہ مکمل طور پر میری ذاتی پسند تھی۔انہوں نے اس تاثر کو بھی مسترد کیا کہ دپیکا نے شوہر کے مذہب کے آگے سرِ تسلیم خم کیا۔
اداکارہ کا کہنا ہے کہ دپیکا اور شعیب ہمیشہ ایک دوسرے کا بھرپور ساتھ دیتے رہے ہیں۔انہوں نے بتایا کہ 2025 میں کینسر کی تشخیص کے بعد شعیب نے دپیکا کا ہر مرحلے پر ساتھ دیا جبکہ دپیکا بھی برسوں سے شعیب اور ان کے خاندان کی بھرپور حمایت کرتی رہی ہیں۔واضح رہے کہ دپیکا ککڑ اور شعیب ابراہیم کی شادی 2018 میں ہوئی تھی اور اس فنکار جوڑی کا 3 سالہ بیٹا روحان بھی ہے۔
