تہران(رپورٹنگ آن لائن) ایران کے سپریم لیڈر آیت اللہ سید مجتبیٰ خامنہ ای نے قومی پاپولیشن ڈے پر مؤثر اقدامات کرنے پر زور دیتے ہوئےکہا ہے کہ ایرانی قوم کی طاقت کا تسلسل براہِ راست آبادی کے بڑھنے سے وابستہ ہے۔
ایرانی میڈیا کے مطابق قومی پاپولیشن ڈے کے موقع پر جاری ایک پیغام میں سپریم لیڈر مجتبیٰ خامنہ ای نے شرحِ پیدائش بڑھانے کی ضرورت پر روشنی ڈالی اور بچے پیدا کرنے کے رجحان کو فروغ دینے کی کوششیں تیز کرنے کا مطالبہ کیا۔
ایرانی سپریم لیڈر نے آبادی کے شعبے میں کام کرنے والے کارکنوں کے اس خط کا جواب دیا جس میں ان کے والد آیت اللہ خامنہ ای کی شہادت پر تعزیت اور محبت کا اظہار کیا گیا تھا۔
مجتبیٰ خامنہ ای نے کہا کہ آبادی میں اضافے کی ضرورت کو کبھی کبھی صرف ماضی کی پالیسی کی خامیوں کی تلافی کے طور پر دیکھا جاتا ہے، تاہم اس کا ایک زیادہ اہم سٹریٹجک پہلو بھی ہے۔
انہوں نے کہا کہ آبادی میں اضافے کی درست اور یقینی پالیسی پر عمل کرتے ہوئے، عظیم ایرانی قوم مستقبل میں بڑے کردار اور سٹریٹجک کامیابیاں حاصل کرنے کے قابل ہو گی اور ایک نئی اسلامی ایرانی تہذیب کی تشکیل کی جانب بڑے قدم اٹھا سکے گی۔
ایرانی سپریم لیڈر کا کہنا تھا کہ مرحوم رہبر نے عوامی اور نجی حاضرین کے ساتھ ملاقاتوں اور خط و کتابت میں اس موضوع کو بہت اہمیت دی، اور یہ اسلامی نظام کے سب سے اہم سٹریٹجک معاملات میں سے ایک ہے۔
انہوں نے آبادی کے شعبے میں کام کرنے والے عوامی کارکنوں کی تعریف کی اور انہیں اپنی کوششیں جاری رکھنے کی ترغیب دی۔
مجتبیٰ خامنہ ای نے کہا کہ آبادی کے شعبے میں عوامی کارکنوں کی بڑھتی ہوئی کوششیں اور بچوں کی پیدائش کے رجحان کو فروغ دینا روشن مستقبل کے حصول میں نمایاں اثر ڈال سکتا ہے۔
