لاہور (رپورٹنگ آن لائن)وزیراعلیٰ پنجاب مریم نواز شریف نے کہا ہے کہ اچھا استاد معاشرے میں مثبت تبدیلیوں کی بنیاد رکھ سکتا ہے،استاد کا مرتبہ، عظمت لازوال ہے، اپنے شفیق ٹیچرز کے لئے آج بھی عزت و احترام کا جذبہ برقرار ہے۔
انہوں نے اساتذہ کے عالمی دن پر اپنے خصوصی پیغام میں معلم اعظم حضرت محمدۖ پر کروڑوں درودو سلام پیش کیا اور قابل احترام اساتذہ کو شاندار خراج تحسین پیش کیا۔انہوں نے کہا کہ اپنے گرامی قدر اساتذہ سمیت ہر استاد کو سلام پیش کرتی ہوں، ٹیچرز ڈے پر پنجاب کے لاکھوں اساتذہ کرام کے اخلاص، محنت اور لگن کو سراہتی ہوں، استاد کا مرتبہ، عظمت لازوال ہے، اپنے شفیق ٹیچرز کے لئے آج بھی عزت و احترام کا جذبہ برقرار ہے۔ان کا کہنا تھا کہ اساتذہ معاشرے کا سب سے معتبر طبقہ ہے اور استاد ہی طالب علم کو فرش سے عرش کی جانب لے جاتا ہے، اچھا استاد علم ہی نہیں بلکہ ادب، اخلاقی اقدار اور معاشرتی روایات سے بھی روشناس کرواتا ہے۔
وزیراعلیٰ پنجاب نے کہا کہ اچھا استاد معاشرے میں مثبت تبدیلیوں کی بنیاد رکھ سکتا ہے، حکومت پنجاب معیاری تعلیم کے فروغ کیلئے صوبہ بھر میں نوازشریف سکول آف ایمیننس جیسے پروگرام متعارف کرا رہی ہے، طلبہ کو جدید علوم و فنون سے متعارف کرانے کے لئے پرائمری ایجوکیشن اے آئی متعارف کرا رہے ہیں۔مریم نوازشریف کا کہنا تھا کہ اساتذہ کرام کو انگلش بول چال، انفارمیشن ٹیکنالوجی اور دیگر جدید طرز تدریس سے متعارف کرانے کے لئے ٹریننگ فری کرائی جا رہی ہے۔
