بیجنگ (رپورٹنگ آن لائن) چینی وزیر خارجہ وانگ ای نے بیجنگ میں سیشلز کے وزیر خارجہ بیری فاور سے ملاقات کی۔
منگل کے روز وانگ ای نے کہا کہ اس سال چین اور سیشلز کے درمیان سفارتی تعلقات کے قیام کی 50ویں سالگرہ ہے۔ چین اس موقع کو بنیاد بناتے ہوئے ڈیجیٹل معیشت، سمندری معیشت، جزیرہ جاتی معیشت اور سبز معیشت کے شعبوں میں سیشلز کے ساتھ تعاون کو فروغ دینے اور دونوں ممالک کے درمیان اسٹریٹجک شراکت داری کو اعلیٰ سطح تک بڑھانے کے لیے تیار ہے۔
وانگ ای نے کہا کہ حال ہی میں، سیشلز حکومت نے کئی دوست ممالک کی حکومتوں کے ساتھ مل کر “تائیوان کی علیحدگی پسند” قوتوں کے نمائندے لائی چھنگ ڈے کے بیرونِ ملک سفر کے لیے پرواز کا اجازت نامہ منسوخ کیا اور ایک چین کے اصول پر اپنے دوٹوک مؤقف کا مضبوط اظہار کیا، جسے چین انتہائی قدر کی نگاہ سے دیکھتا ہے۔ چین سیشلز کے ساتھ مل کر کثیرالجہتی نظام کے تحفظ، عالمی حکمرانی کو بہتر بنانے، اور مشترکہ ترقی و خوشحالی کو فروغ دینے کے لیے تیار ہے۔
سیشلز کے وزیر خارجہ بیری فاور نے کہا کہ سیشلز اور چین سچے دوست ہیں۔ پچاس سال قبل سفارتی تعلقات کے قیام کے بعد سے، چین نے ہمیشہ سیشلز کو برابر کا درجہ دیا ہے اور سیشلز کی معاشی و سماجی ترقی میں اہم مدد فراہم کی ہے۔ سیشلز نے ایک چین کی پالیسی پر اپنا موقف دہرایا ہے اور یہ موقف مستقبل میں بھی برقرار رہے گا۔ سیشلز چینی صدر شی جن پھنگ کے تجویز کردہ چار گلوبل انیشی ایٹوز کی حمایت کرتا ہے اور سفارتی تعلقات کے قیام کی 50ویں سالگرہ کے موقع سے فائدہ اٹھا کر چین کے ساتھ قریبی اعلیٰ سطحی تبادلے اور اسٹریٹجک شراکت داری کی ترقی کو فروغ دینے کے لیے تیار ہے۔
