سارہ انعام قتل کیس

سارہ انعام قتل کیس، ملزم شاہنواز کی والدہ کی عبوری ضمانت میں 3اکتوبر تک توسیع

اسلام آباد(رپورٹنگ آن لائن)سارہ انعام قتل کیس میں مرکزی ملزم شاہنواز کی والدہ کی عبوری ضمانت میں 3 اکتوبر تک توسیع کردی گئی، تفصیلات کے مطابق ہفتہ کو اسلام آباد کی ڈسٹرکٹ اینڈ سیشن کورٹ میں سارہ انعام قتل کیس کی سماعت کے موقع پر ملزم کی والدہ اپنے وکیل ارسل امجد ہاشمی کے ہمراہ عدالت کے سامنے پیش ہوئیں،تفتیشی افسر نے رکارڈ ایڈیشنل سیشن جج شیخ محمد سہیل کی عدالت میں پیش کیا،وکیل ارسل امجد ہاشمی نے کہا کہ 23ستمبر کی دوپہر 12:37 پر ملزم نے واٹس ایپ میسج کیا، میسج میں شاہنواز نے والدہ کو کہا کہ آپ سارہ کی فیملی سے رخصتی کی بات کریں،

وکیل نے عدالت میں مزید بتایا اس کے بعد ملزم کی والدہ سو گئیں، انہیں نہیں معلوم رات کو کیا ہوا، ملزم کی والدہ کچن میں تھیں اور وقوعہ والے کمرے سے کچن دور ہے،وکیل ارسل امجد ہاشمی کے مطابق صبح 9:12پر ملزم نے اپنی والدہ کو کال کی تو وہ جائے وقوعہ پر پہنچیں، ملزم کی والدہ کا کردار صرف اتنا تھا کہ شاہنواز کے کمرے میں بیٹھ کر پولیس کو اطلاع دی،ارسل امجد ہاشمی کا مزید کہنا تھا کہ اسلام آباد پولیس نے فارم ہاﺅس آکر مرکزی ملزم شاہنواز کو گرفتار کرلیا،عدالت نے اس موقع پر پوچھا کہ آپ نے جو کالز کا ریکارڈ ساتھ لگایا ہے اس میں تو کالز بھی موصول ہوئی ہیں،وکیل ارسل امجد ہاشمی نے کہا کہ صبح 9:12بجے کال اور 12:37پر وائس ایپ آیا تھا،تفتیشی افسر کا کہنا تھا کہ کینیڈا سے سارہ انعام کا خاندان بھی آیا ہے جو آج پولیس کو بیان بھی ریکارڈ کرائیں گے۔