لاہور(نمائندہ خصوصی)وزیرِاعلیٰ پنجاب مریم نواز شریف نے رمضان المبارک کی آمد پراپنے پیغام میں اہل پنجاب سمیت تمام امت مسلمہ کو رمضان المبارک کی مبارکباد دی ہے۔
رمضان المبارک کی برکتیں سمیٹنے کی سعادت نصیب ہونے پر اللہ کریم کے شکر گزار ہیں۔وزیراعلیٰ مریم نوازشریف نے کہاکہ رمضان صبر، تقویٰ، ایثار کا درس دیتا ہے۔یہ مہینہ اللہ کی رحمتوں،برکتوں اور مغفرت کا موسم ہے، دُعائیں قبول ہوتی ہیں۔ دعا ہے کہ رمضان المبارک پاکستان کے لیے امن، ترقی اور خوشحالی کا پیغام لے کر آئے۔
وزیراعلیٰ مریم نوازشریف نے کہاکہ تاریخ میں پہلی بار نگہبان رمضان پیکیج کے تحت لاکھوں نادارخاندانوں کو ان کی دہلیز پر راشن فراہم کیا گیا۔پنجاب میں راشن کے لیے قطاروں کا خاتمہ کیا، ریاست نے خودمدد نادار افراد کی دہلیز پر پہنچائی۔نگہبان رمضان پیکیج 2025 کے تحت 31 ارب روپے کی مالی امداد مستحق خاندانوں تک براہ راست گھروں میں پہنچائی جارہی ہے۔
رمضان المبارک میںہر محروم معیشت گھرانے کو10 ہزار روپے دئیے جارہے ہیں تاکہ وہ ضروریات عزت و وقار کے ساتھ پوری کر سکیں۔وزیراعلیٰ مریم نوازشریف نے کہاکہ پنجاب بھر میں سہولت رمضان بازار قائم کیے گئے ہیں، افسران کو فیلڈ ڈیوٹیز تفویض کر دی گئیں۔
وزیراعلیٰ مریم نوازشریف نے کہاکہ رمضان المبارک صرف عبادات نہیںبلکہ ضرورت مندوں کا ہاتھ تھامنے اور سہارا بننے کا مہینہ بھی ہے۔ صاحبِ استطاعت افراد اپنے اردگرد نادار لوگوں کی ضروریات کا خیال رکھیں۔
