تہران (نمائندہ خصوصی) امریکہ اور ایران کے بیانات میں تبدیلی کے بعد مشرقِ وسطیٰ میں صورتحال بحران سے فریم ورک سازی کی جانب گامزن ہو گئی۔
تہران سے الجزیرہ ٹی وی نے رپورٹ کیا ہے کہ دونوں فریق اس بات کا اشارہ دے رہے ہیں کہ وہ امن معاہدے کے بہت قریب پہنچ چکے ہیں، تجزیاتی طور پر واضح ہوتا جا رہا ہے کہ حقیقی پیشرفت ایک فریم ورک کی تشکیل کی طرف ہو رہی ہے تاکہ کسی حتمی معاہدے تک پہنچا جا سکے۔
ایران کی ترجیح ہے کہ تمام محاذوں پر جنگ کا خاتمہ کیا جائے، جس میں اسرائیل کے لبنان پر جاری حملے بھی شامل ہیں، تہران اس بات پر زور دے رہا ہے کہ معاملات کو مرحلہ وار طے کیا جائے، جن میں پابندیوں میں نرمی اور جوہری پروگرام سے متعلق امور سب سے اہم رکاوٹیں ہیں۔
ایرانی حکام کا کہنا ہے کہ آئندہ تین سے چار دن انتہائی اہم ہیں اور اس دوران یہ واضح ہو جائے گا کہ آیا کوئی حقیقی پیشرفت ممکن ہے یا نہیں۔
مجموعی صورتحال کے بارے میں تجزیہ کاروں کا کہنا ہے کہ موجودہ پیشرفت اس بات کی علامت ہے کہ صورتحال بحران سے نکل کر جامع معاہدے کے فریم ورک کی تشکیل کی طرف بڑھ رہی ہے۔
