کراچی(رپورٹنگ آن لائن)کورونا وائرس کی وبا کے دوران روزگار کے تحفظ کیلئے اسٹیٹ بینک کی اسکیم کے تحت اب تک 11 لاکھ، 83 ہزار، 242 ملازمین کے روزگار کو تحفظ فراہم کیا گیا ہے۔
اسٹیٹ بینک نے کورونا وائرس کے باعث پیدا ہونے والی معاشی مشکلات اور بے روزگاری روکنے کے لیے یہ اسکیم متعارف کرائی ہے۔ اسکیم کے تحت کاروباری ادارے مستقل، کنٹریکٹ اور دہاڑی دار سمیت ہر قسم کے ملازمین وآؤٹ سورس کارکنان کو تنخواہوں کی ادائیگی کے لیے سستے قرضے حاصل کر سکتے ہیں۔
اسکیم کے تحت اپریل 2020 سے جون 2020 کے دوران اپنے ملازمین کو برطرف نہ کرنے والے ادارے ملازمین کی تین ماہ کی تنخواہوں کے لیے 5 فیصد شرح سود پر قرض حاصل کر سکتے ہیں۔فعال ٹیکس گزاروں کی فہرست میں شامل اداروں کو 4 فیصد کی شرح پر قرضہ کی سہولت دی گئی ہے۔ سکیم میں ان چھوٹے کاروباری اداروں کو ترجیح دی جا رہی ہے جن کاروباری اداروں کی تین ماہ کی اجرتوں اور تنخواہوں کا خرچ 20 کروڑ روپے تک ہے۔
وہ اس پوری رقم کی فنانسنگ حاصل کر سکیں گے۔اسٹیٹ بینک کی جانب سے جاری کردہ اعدادوشمارکے مطابق 26 جون تک اس سکیم کے تحت 2486 کاروباری اداروں اور کمپنیوں نے 13 لاکھ، 97 ہزار، 145 ملازمین کے روزگارکے تحفظ کیلئے ایک کھرب 39 ارب 71 کروڑ روپے سے زائد کے قرضہ کیلئے درخواستیں دائر کیں۔
اعدادوشمار کے مطابق اسٹیٹ بینک نے ان میں سے 1817 اداروں اور کمپنیوں کی جانب سے ایک کھرب، 19 ارب، 98 لاکھ روپے تک کے قرضہ درخواستوں کی منظوری دی اور یوں 11 لاکھ، 83 ہزار سے زائد ملازمین کے روزگار کو تحفظ فراہم کیا گیا۔
