بیجنگ (رپورٹنگ آن لائن) چینی صدر شی جن پھنگ نے درخواست پر سعودی ولی عہد اور وزیر اعظم محمد بن سلمان کے ساتھ ٹیلی فون پر بات کی۔
پیر کے روز شی جن پھنگ نے نشاندہی کی کہ اس سال دونوں ممالک کے درمیان جامع اسٹریٹجک شراکت داری کے قیام کی 10ویں سالگرہ ہے۔ چین سعودی عرب کے ساتھ مل کر اس موقع سے فائدہ اٹھاتے ہوئے اسٹریٹجک باہمی اعتماد کو گہرا کرنے، عملی تعاون کو مضبوط بنانے اور چین اور عرب ممالک کے درمیان تعلقات کی ترقی میں مثالی کردار ادا کرنے کے لیے تیار ہے۔
مشرق وسطیٰ اور خلیجی خطے کی صورتحال کے حوالے سے شی جن پھنگ نے اس بات پر زور دیا کہ چین فوری اور مکمل فائر بندی اور جنگ کے خاتمے کا حامی ہے۔ چین امن کی بحالی کے لیے سازگار تمام کوششوں کی حمایت کرتا ہے اور تنازعات کو سیاسی اور سفارتی ذرائع سے حل کرنے پر قائم ہے۔ ان کا کہنا تھا کہ آبنائے ہرمز کو معمول کی آمدورفت کے لیے کھلا رہنا چاہیے، جو کہ خطے کے ممالک اور عالمی برادری کے مشترکہ مفاد میں ہے۔ چین خوشگوار ہمسائیگی، ترقی، سلامتی اور تعاون پر مبنی برادری کی تشکیل میں خطے کے ممالک کی حمایت کرتا ہے تاکہ وہ اپنے مستقبل اور تقدیر کا فیصلہ خود کر سکیں اور خطے میں دیرپا امن و استحکام کو فروغ دیا جائے۔
محمد بن سلمان نے کہا کہ سعودی چین تعلقات اسٹریٹجک اہمیت کے حامل ہیں اور چین کے ساتھ تعلقات کو فروغ دینا سعودی عرب کے لیے نہایت اہم ہے۔ سعودی عرب تنازعات اور اختلافات کو بات چیت کے ذریعے حل کرنے کے لیے پرعزم ہے اور چاہتا ہے کہ صورت حال مزید نہ بگڑے۔
ان کا کہنا تھا کہ ایک ذمہ دار بڑی عالمی طاقت کے طور پر چین نے ہمیشہ منصفانہ موقف کو برقرار رکھا ہے۔ سعودی عرب چین کے ساتھ رابطے اور تعاون کو مضبوط کرنے کے لیے تیار ہے تاکہ جنگ کے دوبارہ آغاز کو روکا جائے، آبنائے ہرمز میں محفوظ جہاز رانی کی آزادی کو یقینی بنایا جائے اور خطے میں پائیدار امن و استحکام کے حصول کے لیے مشترکہ طور پرراستہ تلاش کیا جائے۔
