اسلام آباد(رپورٹنگ آن لائن)قومی اسمبلی کے رکن شیر افضل مروت نے کہاہے کہ سہیل آفریدی کے بطور وزیر اعلیٰ انتخاب کو چیلنج کرنے جا رہا ہوں۔
ایک بیان میں شیر افضل مروت نے کہا کہ خیبر پختونخوا کی تباہی اور خراب گورننس کا حشر زبان زد عام ہے، کے پی ہیلتھ سیکٹر اور اسپتالوں میں کم قیمت میں دوائیاں خریدی بیچی جا رہی ہیں۔انہوں نے کہا کہ علی امین گنڈاپور کو میرے چیلنج کرنے کا معلوم ہوا تو اس نے کہا ایسا نہیں کرنا، میں علی امین گنڈاپور کی بات کو اب رد کر رہا ہوں اور انتخاب کو چیلنج کروں گا۔
شیر افضل مروت نے کہا کہ بانی پی ٹی آئی بمقابلہ نواز شریف کیس میں سپریم کورٹ نے فیصلہ دے رکھا ہے، 2018 میں نواز شریف کے سینیٹر کی ٹکٹوں پر بانی عدالت گئے۔انہوںنے کہاکہ سپریم کورٹ نے فیصلہ دیا کہ سزا یافتہ جیل سے کوئی احکامات نہیں دے سکتا، بانی پی ٹی آئی کے حکم پر سلمان اکرم راجا نے اڈیالہ کے باہر نامزدگی کا بتایا تھا۔انہوں نے کہاکہ میں نامزدگی عدالت میں چیلنج کر رہا ہوں، امید ہے سہیل آفریدی گھر جائیں گے،
میری کوئی ذاتی عداوت نہیں لیکن سہیل آفریدی کو لانے کا فیصلہ غلط تھا، ان کو لانے کے فیصلے نے پارٹی کو توڑ کر رکھ دیا ہے۔شیر افضل مروت نے کہاکہ سہیل آفریدی پارٹی کی مزاحمت کی طاقت کو نچلے مقام پر لے آیا ہے، وہ چند ماہ مزید رہا تو پارٹی تنکوں کی طرح بکھر جائے گی، پارٹی بچانی ہے تو سہیل آفریدی اور سلمان اکرم راجہ وغیرہ کو سائیڈ لائن کرنا ہو گا۔انہوںنے کہاکہ بیرسٹر گوہر اور علی امین گنڈاپور کو اختیار دیا جانا چاہیے، اگر بیرسٹر گوہر اور علی امین کو بااختیار بنایا جائے تو بانی 3ماہ میں باہر آجائیں گے۔
