برسلز (رپورٹنگ آن لائن) اقوام متحدہ کے سکریٹری جنرل انتونیو گوٹیرس نے اقوام متحدہ کی ریلیف اینڈ ورکس ایجنسی برائے فلسطینی پناہ گزین اونراکو درپیش بحران کے بارے میں خبردار کیاہے ۔ انہوں نے امداد دینے والے بین الاقوامی عطیہ دہندگان سے مطالبہ کیا کہ وہ امدادی ایجنسی کے کام کو جاری رکھنے کو یقینی بنانے کے لیے فوری مالی مدد فراہم کریں۔میڈیارپورٹس کے مطابق انہوں نے بیلجیئم کے دارالحکومت برسلز میں منعقدہ سویڈن اور اردن کے زیر اہتمام منعقدہ بین الاقوامی ڈونر کی بین الاقوامی کانفرنس سے خطاب کے دوران کہا کہ اونروا کو اپنے بقا کا چیلنج درپیش ہے۔
گوٹیرس نے ایک ریکارڈ شدہ پیغام میں کہا کہ اونرا علاقائی استحکام کو فروغ دینے میں اہم کردار ادا کرتا ہے لیکن اسے اب ایک وجودی بحران کا سامنا ہے۔انہوں نے مزید کہاکہ بار بار فنڈنگ کے بحرانوں کی وجہ سے اونروا نے کفایت شعاری کے اقدامات کیے ہیں۔گوٹیریس نے کانفرنس میں شرکت کرنے والے اداروں اور ڈونر ممالک کے نمائندوں سے مطالبہ کیا کہ ایجنسی کے کام کرنے کی صلاحیت کو برقرار رکھنے کے لیے فوری اور فیصلہ کن مدد کریں۔
