بیجنگ (رپورٹنگ آن لائن) چین کی وزارت خارجہ کے ترجمان گو جیا کھون نے یومیہ پریس کانفرنس کی صدارت کرتے ہوئے امریکی صدر ٹرمپ کے دورۂ چین کے حوالے سے بتایا کہ یہ امریکہ اور چین کے سربراہان کی گزشتہ سال اکتوبر میں بوسان ملاقات کے بعد ایک اور بالمشافہ ملاقات ہوگی، جبکہ امریکی صدر 9 برس بعد دوبارہ چین کا دورہ کریں گے۔
چینی صدر شی جن پھنگ، صدر ٹرمپ کے ساتھ چین امریکہ تعلقات اور عالمی امن و ترقی سے متعلق اہم مسائل پر گہرائی سے تبادلہ خیال کریں گے۔ ترجمان نے کہا کہ سربراہان کی سفارتکاری چین امریکہ تعلقات میں ناقابل متبادل اسٹریٹجک رہنمائی فراہم کرتی ہے۔ چین، امریکہ کے ساتھ برابری، احترام اور باہمی فوائد کے جذبے کے ساتھ تعاون میں توسیع اور اختلافات پر قابو پانے کے لیے تیار ہے، تاکہ دنیا کی غیر یقینی صورتحال میں استحکام اور یقین دہانی پیدا کی جا سکے۔
ایران کی فوجی سرگرمیوں میں معاونت کے الزام میں چینی کمپنیوں پر امریکی پابندیوں کے حوالے سے گو جیا کھون نے کہا کہ چین، بین الاقوامی قانون کی بنیاد اور اقوامِ متحدہ کی سلامتی کونسل کی منظوری کے بغیر عائد کی جانے والی یکطرفہ پابندیوں کی سخت مخالفت کرتا ہے۔ انہوں نے کہا کہ چین ہمیشہ اپنی کمپنیوں سے قانون اور ضوابط کے مطابق کاروباری سرگرمیاں انجام دینے کا تقاضا کرتا ہے اور اپنے اداروں کے جائز حقوق و مفادات کا بھرپور تحفظ کرے گا۔
