لاہور(خصوصی رپورٹر) پاکستان مسلم لیگ (ن)کے صدر شہبازشریف نے لائن آف کنٹرول پربھارتی افواج کی جنگ بندی کی خلاف ورزیوں اور بے گناہ شہریوں کو نشانہ بنانے کی مذمت کرتے ہوئے کہاکہ چین، پاکستان، نیپال، افغانستان اور خطے کے دیگر ممالک بھارتی دہشت گردی اور جارحیت کا نشانہ ہیں ۔
پاکستان کے ساتھ ایل او سی اورچین کے ساتھ ایل اے سی بھارتی جارحیت اور جنگی جنون کا نشانہ ہیں ۔بھارت کی اپنے ہمسایوں کے خلاف جنگ وجدل اور سازشیں خطے اور عالمی امن کے لئے سنگین خطرہ ہیں۔انہوںنے کہاکہ چین سے مار کھانے کا غصہ بھارت مقبوضہ جموں وکشمیر اور ایل۔او۔سی کے بے گناہ شہریوں پر نکال رہا ہے ۔آر ایس ایس کے زیراثر انتہاپسند بی جے پی اپنی فوج اور عوام کی ذلت ورسوائی کے اقدامات سے باز آجائے ۔بھارت میں برسراقتدار انتہاپسند جنونی ٹولہ مظلوم انسانوں کا لہو بہا کر ذہنی فسطائیت کا ثبوت دے رہا ہے ۔
خطے کے دیگر ممالک کو مل کر بھارتی جارحیت کے خلاف مشترکہ حکمت عملی اپنانی چاہئے ۔چین، پاکستان، روس اور خطے کے تمام امن پسند ممالک بقائے باہمی اور جارحیت پسندوں کے خلاف مل کر لڑنے کا سمجھوتہ کریں۔قائد حزب اختلاف کا ایل او سی کے باگسر اور نکیال سیکٹر میں شہید ہونے والے شہریوں کے لئے بلندی درجات، لواحقین کے لئے صبرجمیل کی دعا۔شہبازشریف کی طرف سے زخمیوں کی جلد صحت یابی کے لئے بھی دعا اور نیک تمناوں کا اظہار کیا ۔
