اسلام آباد (رپورٹنگ آن لائن)وفاقی وزیر داخلہ محسن نقوی نے کہاہے کہ آئی پی پیز سے متعلق ایم کیو ایم کے تحفظات وزیراعظم تک پہنچائے ہیں ، تحفظات جلد دور ہوچائیں گے ، بلوچستان میں احتجاج صوبائی معاملہ ہے ، پاراچنار اور بلوچستان کی سکیورٹی معاملات پر صوبوں سے رابطے میں ہوں ۔
وہ بدھ کو اسلام آباد ماڈل کالج فار گرلز میں سکولوں اور کالجوں میں کھیلوں کے فروغ کے لئے طلبامیں سپورٹس کٹس تقسیم کرنے کی تقریب سے خطاب کر رہے تھے ۔ وفاقی وزیر تعلیم و سائنس و ٹیکنالوجی خالد مقبول صدیقی ، سیکرٹری تعلیم محی الدین وانی بھی اس موقع پر موجود تھے ۔ اسلام آباد ماڈل کالج فار گرلز آمدپر وفاقی وزیر تعلیم خالد مقبول صدیقی نے وزیرداخلہ محسن نقوی کا خیر مقدم کیا۔
وزیرداخلہ محسن نقوی نے طلبا و طالبات میں سپورٹس کٹ اور ٹریک سوٹ تقسیم کئے۔وزیرداخلہ محسن نقوی نے سکول میں قائم جدید ترین کمپیوٹر لیب کا دورہ کیا۔وزیرداخلہ محسن نقوی نے کمپیوٹر لیب میں طالبات سے کورسز کے بارے دریافت کیا۔طالبات سے کہا کہ ہم لیب میں اے آئی اور بلاک چین کی ٹریننگ حاصل کر رہی ہیں۔ وزیرداخلہ نے ڈے کیئر سنٹر کا بھی وزٹ کیا۔وزیر داخلہ نے کہا کہ خالد مقبول صدیقی غریب پرور اور لوگوں کا بہت خیال رکھتے ہیں۔ تاریخ میں پہلی باراسلام آباد کے پرائمری سکولوں کے بچوں کے لیے فری لنچ شروع کیا جا رہا ہے۔ اسلام آباد کے تعلیمی اداروں کی بہتری کیلئے وزارت تعلیم کے ساتھ ہیں۔
وزارت تعلیم کی بھرپور معاونت کریں گے۔سکولوں کی اپ گریڈیشن کے لئے مل کر کام کریں گے۔ صحافیوں سے بات چیت کرتے ہوئے وزیر داخلہ محسن نقوی نے آئی پی پیز کے حوالے سے تحفظات دور کرنے کی یقین دہانی کراتے ہوئے کہا کہ آئی پی پیز کے حوالے سے ایم کیو ایم کے تحفظات وزیراعظم تک پہنچائے ہیں ۔ انہوں نے کہا کہ بلوچستان میں احتجاج صوبائی معاملہ ہے،پاراچنار اور بلوچستان سمیت سکیورٹی معاملات پر صوبوں سے رابطے میں ہوں۔
انہوں نے کہا کہ اس وقت ملک میں صورتحال متوازن ہے ،موجودہ سیاسی صورتحال میں ایسا کوئی ایشو نہیں کہ جس پر پریشانی کی ضرورت ہو۔ انہوں نے کہا کہ عمران خان کا اللہ کو پتا ہے کس سے مذاکرات کریں گے کس سے نہیں ۔ انہوں نے کہا کہ پاراچنار سمیت علاقوں میں صورتحال پر قابو پانے کی کوشش کر رہے ہیں۔
