نارووال(رپورٹنگ آن لائن) وفاقی وزیر منصوبہ بندی،ترقی و خصوصی اقدامات احسن اقبال نے کہا ہے کہ نوجوان پاکستان کا مستقبل ہیں انہیں تعلیم اور کھیلوں کی بہترین سہولیات اور مواقع فراہم کئے جائیں گے۔
ان خیالات کا اظہار انہوں نے یونیورسٹی آف نارووال کے تین روزہ رنگا رنگ سپورٹس فیسٹیول کی سپورٹس سٹی میں افتتاحی تقریب میں طلبہ و طالبات سے خطاب کرتے ہوئے کیا۔ اس موقع پر یونیورسٹی آف نارووال کے وائس چانسلر میریٹوریس پروفیسر ڈاکٹر محمد یونس رانا، رجسٹرار ڈاکٹر محمد حسیب سرور کے علاوہ طلبہ و طالبات کے علاوہ فیکلٹی ممبران ، سیاسی ، سماجی شخصیات کی بڑی تعداد موجود تھی۔
وفاقی وزیر احسن اقبال نے کہا کہ مجھے بڑی خوشی ہے کہ یونیورسٹی آف نارووال نے نارووال سپورٹس سٹیڈیم میں 3روزہ سپورٹس گالا کا اہتمام کیا ہے ،نارووال سپورٹس سٹی وہ منصوبہ ہے جس میں نوجوان کو جدید تربیت سے کھیلنے کا موقع فراہم ہو گا اس منصوبے کو بنانے کے جرم میں عمران خان نے مجھے ڈھائی ماہ قید میں رکھا اور مجھے انتقامی کارروائی کا ہی نشانہ نہیں بنایا بلکہ اس منصوبے کے فنڈز بند کرکے 5سال کام کو روکے رکھا جس سے اس کا باقی ماندہ کام جو 80کروڑ کی لاگت سے مکمل ہونا تھا .
اب اس کا تخمینہ تقریباً سوا 2ارب تک جا پہنچا ہے جو اس ملک کی غریب عوام ٹیکسوں کی صورت میں ادا کریں گے لیکن ہم پرامید ہیں اسی سال ہی ہم اس کا باقی ماندہ کام مکمل کرکے نارووال سپورٹس سٹی کو پاکستان میں کھیلوں کا ایک ایسا جدید مرکز ہو گا جہاں پر مستقبل کے ارشد ندیم انشااللہ ہوں گے اور یہاں پر مقامی نوجوان کو ہی نہیں ملک کے نوجوان کو اس کھیل کی سہولت کو اپنی تربیت اور صلاحیتوں کو دیکھانے کا موقع ملے گا ،لوکل گیمز کے علاوہ ہمارے قومی بلکہ بین الاقوامی ٹیمیں بھی انشااللہ وہ دن دور نہیں جب وہ یہاں آ کر کھلیں گے۔
وفاقی وزیر نے کہا کہ ہمارا تمام ویژن یہی ہے کہ نوجوان کو تعلیم کی سکلز کی اور سپورٹس کی بہترین سہولیات اور مواقع فراہم کئے جائیں گے چونکہ پاکستان کا مستقبل نوجوان ہیں نوجوان ہمارا اثاثہ تب ہی بنیں گے جب ہم ان کو مثبت انداز میں آگے بڑھانے کے موقع ملیں ۔ ہم نوجوانوں کو گالی گلوچ اور نفرت سے لیس نہیں کرنا چاہتے ہم نوجوان کو جدید تعلیم لیب ٹاپ کھیلوں کے سکلز ، ڈیجیٹل سکلزکھیلوں کی یہ سہولتیں دینا چاہتے انشااللہ اڑان پاکستان کے تحت جہاں ہم دیگر معاشی شعبوں میں ترقی کر رہے ہیں ۔
کھیلوں کے اندر بھی ہم خصوصی توجہ دے رہے ہیں ،قومی مقابلوں کا انعقاد کر رہے ہیں ،سپورٹس اکیڈمیز کھول رہے ہیں تاکہ پاکستان کا ٹیلنٹ ابھرے اور پاکستان کو وکٹری سٹینڈ پر اولمپکس کے اندر ایشین گیمز اور بین الاقوامی مقابلوں میں اسی طرح ہمارا پرچم بلند کرے جیسے ارشد ندیم نے ہمارا پرچم بلند کیا ہے ۔ یونیورسٹی آف ناروول کے زیر اہتمام اس سپورٹس فیسٹیول میں 25 کھیلوں کے مقابلے تین دن جاری رہیں گے جس میں یونیورسٹی ف نارووال کے چھ ہزار طلبہ و طالبات کے علاوہ نارووال کے تمام تعلیمی اداروں کے طلبہ و طالبات بھی شرکت کریں گے۔
