راولپنڈی (رپورٹنگ آن لائن ) مرکزی رہنما پاکستان تحریک انصاف بیرسٹر گوہر نے کہا ہے کہ شیر افضل مروت کا ایشو پارٹی کا اندرونی معاملہ ہے، بانی پی ٹی آئی جلد رہا ہونگے۔ اڈیالہ جیل کے باہر میڈیا سے گفتگو کرتے ہوئے بیرسٹر گوہر کا کہنا تھا کہ شیر افضل مروت کا کوئی ایشو نہیں انکو شوکاز نوٹس جاری کیا گیا تھا شیر افضل مروت نے شو کاز نوٹس کا جواب دے دیا ہے ۔ انہوں نے بانی پی ٹی آئی سے ملاقات کے حوالے سے گفتگو کرتے ہوئے کہا کہ ہر ملاقات پر ہماری گاڑیاں روکی جاتی ہیں، بانی پی ٹی آئی سے ملاقات پر رکاوٹیں کھڑی کی جاتی ہیں۔
بیرسٹر گوہر نے دعوی کیا ہے کہ بانی پی ٹی آئی ایک ڈیڑھ مہینے کے اندر رہا ہوں گے ، عدلیہ کا ٹیسٹ ہے وہ بانی پی ٹی آئی کے کیسز پر کیا فیصلے دیتی ہے، ایک کیس میں ضمانت ہوچکی ہے اب دو کیسز رہتے ہیں۔ رہنما تحریک انصاف کا مزید کہنا تھا کہ ملک میں غیر یقینی صورت حال ہے الیکشنز میں ہمارا مینڈیٹ چوری کیا گیا مہنگائی بڑھ رہی ہے دہشت گردی بھی بڑھ رہی ہے اللہ اس ملک پر اپنا رحم فرمائے۔