اسلام آباد (رپورٹنگ آن لائن ) گذشتہ مالی سال کے پہلے گیارہ ماہ کے دوران خدمات کے شعبہ کے تجارتی خسارہ میں 41.63فیصد کمی ہوئی ہے۔ ادارہ برائے شماریات پاکستان(پی بی ایس) کے اعدادوشمارکے مطابق گذشتہ مالی سال میں جولائی تا مئی2019-20ئ کے دوران خدمات کے شعبہ کی ملکی برآمدات میں 8.52 فیصد جبکہ درآمدات میں 23.61فیصد کمی ہوئی ہے۔
رپورٹ کے مطابق جولائی تا مئی 2019-20ئ کے دوران برآمدات کا حجم 5.520ارب ڈالر کے مقابلہ میں5.050 ارب ڈالر تک کم ہوا ہے۔دوسری جانب خدمات کے شعبہ کی درآمدات بھی 23.61فیصد کی کمی سے مالی سال 2018-19ئ کے اسی عرصہ کے دوران درآمدات10.146 ارب ڈالر کے مقابلہ میں گذشتہ مالی سال کے اسی عرصہ میں 7.750 ارب ڈالر تک کم ہوئی ہیں۔
پی بی ایس کے مطابق گذشتہ مالی سال میں جولائی تا مئی2019-20ئ کے دوران خدمات کے شعبہ کا تجارتی خسارہ2.700 ارب ڈالر تک کم ہوگیا جبکہ جولائی تا مئی 2018-19 میں شعبہ کا تجارتی خسارہ 4.625 ارب ڈالر رہا تھا۔ اس طرح مالی سال 2019ئ کے مقابلہ میں گذشتہ مالی سال 2020ئ کے پہلے گیارہ مہینوں میں خدمات کے شعبہ کے تجارتی خسارہ میں 41.63 فیصد کی نمایاں کمی ریکارڈ کی گئی ہے۔
