بیجنگ (رپورٹنگ آن لائن) چینی وزارت خارجہ کے ترجمان گو جیا کھون نے چین کی ایگزی بیشن ٹیم کی جانب سے تائیوان سے متعلق غلط اقدامات کے خلاف جنوبی کوریا کی گوانگجو بیینالے بین الاقوامی نمائش سے دستبردار ہونے کے معاملے پر تبصرہ کیا۔
ترجمان نے کہا کہ اس بار نمائش کے منتظمین نے غلط طرزعمل پر اصرار کرتے ہوئے چین کے تائیوان علاقے کو اس کی حیثیت سے مکمل طور پر مطابقت نہ رکھنے والے نام کے تحت نمائش میں شرکت کی اجازت دی، جو صریحاً ایک چین کے اصول کی خلاف ورزی ہے۔ چین اس کی سخت مخالفت کرتا ہے اور متعلقہ فریق سے مطالبہ کرتا ہے کہ وہ فوری طور پر اپنی غلط روش درست کریں۔
ترجمان نے زور دے کر کہا کہ چین اور جنوبی کوریا کے درمیان سفارتی تعلقات کے قیام سے متعلق مشترکہ اعلامیے میں واضح طور پر کہا گیا ہے کہ جمہوریہ کوریا کی حکومت عوامی جمہوریہ چین کی حکومت کو چین کی واحد قانونی حکومت تسلیم کرتی ہے اور چین کے اس مؤقف کا احترام کرتی ہے کہ دنیا میں صرف ایک چین ہے اور تائیوان چین کا حصہ ہے۔رواں سال کے آغاز سے جنوبی کوریا کی جانب سے متعدد مرتبہ واضح کیا گیا ہے کہ ایک چین کے اصول پر اس کا مؤقف تبدیل نہیں ہوا۔ امید ہے کہ جنوبی کوریا کی حکومت اپنے سیاسی وعدے کی پاسداری کرے گی، اپنی ذمہ داری حقیقی معنوں میں نبھائے گی اور عملی اقدامات کے ذریعے ایک چین کے اصول پر عمل درآمد کرے گی۔
