کراچی(رپورٹنگ آن لائن )متحدہ قومی موومنٹ(ایم کیو ایم) پاکستان کے رہنما مصطفی کمال نے کہا ہے کہ پی ٹی آئی میں شامل ہونے سے انکار کیا تو نیب کا کیس بنا دیا گیا، یہ نہیں ہو سکتا کہ ایک ڈومیسائل والے کے ساتھ ایک اور دوسرے کے ساتھ الگ رویہ ہو، غلطیاں ہم سے بھی ہوئی ہیں۔
کراچی کی احتساب عدالت میں میڈیا سے گفتگو کرتے ہوئے مصطفی کمال نے کہا کہ عمران خان کی حکومت میں مجھ پر جھوٹا کیس بنا۔انہوں نے کہا کہ عمران خان کی حکومت میں فرمائش ہوئی کہ پی ٹی آئی میں شامل ہو جاؤ۔
مصطفی کمال کا کہنا ہے کہ آج جو اس ملک میں ہو رہا ہے مجھے پاکستانی معاشرے پر حیرت ہے۔ پچھلے چار دن میں جو کچھ ہوا اپنی ذات کے لئے کر رہے تھے، آپ کا عمل پورے پاکستان میں ایک جیسا ہونا چاہیے۔
انہوں نے کہا کہ یہ نہیں ہو سکتا کہ ایک ڈومیسائل والے کے ساتھ ایک اور دوسرے کے ساتھ الگ رویہ ہو، غلطیاں ہم سے بھی ہوئی ہیں، آج جو کچھ پاکستان میں ہو رہا ہے پاکستان اس کا متحمل نہیں ہو سکتا۔
