پشاور (رپورٹنگ آن لائن)وفاقی وزیر و صدر مسلم (ن) خیبر پختونخوا انجینئر امیر مقام ہفتہ کے روز دارالعلوم حقانیہ نوشہرہ اکوڑہ خٹک گئے اور دارالعلوم حقانیہ دھماکے کے شہداء کیلئے فاتحہ خوانی کی۔
انجینئر امیر مقام نے مولانا حامد الحق کی شہادت پر گہرے دکھ اور افسوس کا اظہار کرتے ہوئے شہداء کے اہل خانہ سے تعزیت کا اظہار کیا اور لواحقین کیلئے صبر جمیل کی دعا کی۔ انجینئر امیر مقام نے زخمیوں کی جلد صحت یابی کیلئے بھی دعا کی۔ اس موقع پر وفاقی وزیر انجینئر امیر مقام نے کہا کہ مسجد میں نمازِ جمعہ کے دوران دہشت گردی انتہائی افسوسناک اور قابلِ مذمت ہے۔
دشمن عناصر اس قسم کی بزدلانہ کارروائیوں سے قوم کے حوصلے پست نہیں کر سکتے۔ انہوں نے کہا کہ امن دشمن قوتیں ملک میں عدم استحکام پیدا کرنا چاہتی ہیں، حکومت اور قوم متحد ہیں۔انجینئر امیر مقام نے واقعے کی فوری تحقیقات میں مکمل تعاون کی یقین دہانی کرائی۔
