برسلز(رپورٹنگ آن لائن)عالمی ادارہ صحت نے یورپ کے ایک بار پھر عالمی وبا کا مرکز بننے کی پیش گوئی کرتے ہوئے خبردار کر دیا ہے۔میڈیارپورٹس کے مطابق یورپ میں عالمی ادارہ صحت کے سربراہ کا کہنا تھا کہ براعظم میں فروری تک پانچ لاکھ مزید اموات ہو سکتی ہیں، جس کی وجہ ویکسین کم لگائی جانی ہے۔خطے میں ڈبلیو ایچ او کے ریکارڈ کے مطابق 14 لاکھ اموات ریکارڈ کی گئی ہیں۔ہانس کلوگ کا کہنا تھا کہ خطرناک صورتحال پیدا ہونے سے پہلے ہی اس کی روک تھام کرنی ہو گی، ہمیں کورونا کے بڑھنے کا انتظار نہیں کرنا چاہیے۔اگرچہ سپین میں 80 فیصد تک لوگوں کو ویکسین کی دونوں ڈوز لگائی جا چکی ہیں البتہ یہ تعداد فرانس اور جرمنی میں 68 اور 66 فیصد ہے۔ جبکہ وسطی اور مشرقی یورپ کے کچھ ممالک میں یہ تعداد اس سے بھی کم ہے۔
اعداد و شمار کے مطابق اکتوبر 2021 تک روس میں صرف 32 فیصد افراد کو مکمل طور پر ویکسین لگائی گئی تھی۔ڈبلیو ایچ او کے تکنیکی امور کی سربراہ ماریا وین کرکوف کا کہناتھا کہ گذشتہ چار ہفتوں کے دوران ویکسین ہونے کے باوجود یورپ میں متاثرین کی تعداد 55 فیصد بڑھی ہے۔جبکہ جرمنی میں گزشتہ 24گھنٹوں کے دوران 34 ہزار کورونا متاثرین سامنے آئے جو کہ ایک ریکارڈ تعداد ہے۔جرمنی میں آر کے آئی انسٹیٹیوٹ سے منسلک ڈاکٹر کا کہنا تھا کہ اگر ابھی ہم اس سے نمٹنے کیلئے اقدامات نہیں کریں گے تو چوتھی لہر مزید خطرناک ثابت ہو گی۔جرمنی میں ویکسین نہ لگوانے والوں میں سے 30لاکھ کے قریب لوگوں کی عمریں 60برس سے اوپر ہیں۔ ہلاکتوں میں سب سے اضافہ گذشتہ ہفتے روس اور یوکرین میں دیکھا گیا جہاں 8100اور 3800افراد ہلاک ہوئے۔
