لاہور(رپورٹنگ آن لائن)پرنسپل امیر الدین میڈیکل کالج و لاہور جنرل ہسپتال پروفیسر ڈاکٹر محمد الفرید ظفر نے کہا ہے کہ معروف مذہبی سکالر ڈاکٹر زاکر نائیک نے تبلیغ دین اور اشاعت اسلام میں نمایاں کردار ادا کیا ہے بالخصوص نئی نسل ڈاکٹر زاکر نائیک کے خیالات اور نظریات سے متاثرہوئی ہے.
اسلام کو پوری دنیا میں پھیلانے اور دین کی صحیح روح کی پہچان میں نئی تاریخ رقم کی ہے اور ڈاکٹر زاکر نائیک کی دین کے حوالے سے خدمات روشن باب ہیں۔انہوں نے کہا کہ ڈاکٹر زاکر نائیک کی خدمات نے دنیا بھر میں مسلمانوں اور غیر مسلموں میں اسلام کے بارے میں آگاہی بڑھائی ہے اور اس بات کو واضح کیا ہے کہ اسلام ایک مکمل اور متوازن دین ہے جو انسانوں کی فلاح و بہبود کے لیے بہترین رہنمائی فراہم کرتا ہے۔
اس امر کا اظہار پروفیسر الفرید ظفر نے آج یہاں ڈاکٹر زاکر نائیک کے ساتھ خصوصی نشست کے موقع پر گفتگو کرتے ہوئے کیا۔ علی معین بھی اس موقع پرموجود تھے۔ ڈاکٹرزاکر نائیک نے شرکاء سے گفتگو کرتے ہوئے اس امر پر زور دیاکہ ماہ صیام کے مبارک دنوں میں مذہبی ماحول کا خیال رکھتے ہوئے علمائے کرام کودین کی صحیح تعلیمات کی نشرواشاعت کا کام مزید تیز کر دینا چاہیے۔
انہوں نے کہا کہ آج کے دورمیں سب سے بڑا چیلنج دین اسلام کے بارے میں غیر مسلموں کو آگاہی اور معلومات فراہم کرنا ہے اگر یہ کام بین الاقوامی سطح پر پوری تنظیم اور منصوبہ بندی سے کیا جائے تو اس سے بڑھ کر اسلام کی کوئی اور خدمت نہیں ہو سکتی۔
پرنسپل جنرل ہسپتال پروفیسر الفرید ظفر کا کہنا تھا کہ اسلام پوری انسانیت کی بھلائی اور اجتماعی ترقی کا پیغام بر مذہب ہے اور یہ واحد دین ہے جو ذات پات اور رنگ و نسل سے بالا تر ہو کر ہر انسان کی دنیا وی و آخروی کامیابی کی نوید دیتا ہے اور خصوصاً دکھی انسانیت اورمجبور و بے بس لوگوں کی بحالی اور مدد کرنا اسلام کی بنیادی تعلیمات کاحصہ ہے۔
انہوں نے کہا کہ ڈاکٹر زاکر نائیک لوگوں کی مذہبی و روحانی بنیاد وں پر رہنمائی کرتے ہیں جبکہ دین اسلام انہی روشن تعلیمات کو عملی جامہ پہناتے ہوئے ہیلتھ پروفیشنلز ہسپتالوں میں مریضوں کو طبی امداد دے کر قیمتی جانیں بچانے کا فریضہ سر انجام دیتے ہیں۔ پروفیسر الفرید ظفر نے مزید کہا کہ اس لحاظ سے ہیلتھ پروفیشنلز اور ڈاکٹر زاکر نائیک ایک ہی محاذ پر انسانی خدمت میں مصروف عمل ہیں۔
