کراچی (رپورٹنگ آن لائن)پاکستانی اداکارہ زارا نور عباس کا کہنا ہے کہ ناظرین سے صرف اس لیے پاکستانی فلمیں دیکھنے کی توقع نہیں کی جانی چاہیے کہ وہ پاکستانی ہیں۔اداکارہ کی ایک ویڈیو سوشل میڈیا پر وائرل ہو رہی ہے، جس میں انہوں نے مقامی سنیما کے مستقبل کے حوالے سے بیان دیا ہے۔سوشل میڈیا پر گردش کرنے والی ویڈیو میں زارا نور نے پاکستانی سنیما کو سپورٹ کریں کی طویل عرصے سے جاری اپیل پر گفتگو کرتے ہوئے سوال اٹھایا ہے کہ آیا محض یہ اپیل موجودہ دور کے ناظرین کو سنیما گھروں کا رخ کرنے پر آمادہ کر سکتی ہے؟
اداکارہ نے کہا ہے کہ لوگوں سے پاکستانی سنیما کو سپورٹ کریں کہنا ایک بہت پرانا مقف ہے، اگر ناظرین کسی مقامی فلم کو دیکھنے جائیں تو اس کی وجہ محض قومی وابستگی نہیں بلکہ کوئی حقیقی کشش ہونی چاہیے۔انہوں نے اس بات پر زور دیا کہ فلم سازوں کی بھی ذمے داری ہے کہ وہ مسلسل اپنی صلاحیتوں کو بہتر بنائیں اور بار بار خود کو ثابت کریں، خصوصا ایسے وقت میں جب پاکستانی ناظرین کو بڑی بین الاقوامی فلموں تک باآسانی رسائی حاصل ہے۔
زارا نور عباس نے اسپائیڈر مین فلم سیریز کی مثال دیتے ہوئے کہا کہ معروف بین الاقوامی فلموں نے ناظرین میں اعتماد کی ایسی فضا قائم کر لی ہے کہ لوگ یہ جانے بغیر بھی ٹکٹ خرید لیتے ہیں کہ سیریز کی ہر فلم معیار پر پوری اترے گی یا نہیں، فلم سازوں کی حیثیت سے ہمیں بھی خود کو بہتر بنانا اور بار بار خود کو ثابت کرنا ہو گا۔
