مکوآنہ (رپورٹنگ آن لائن)پاکستان میں کینسر کے مریضوں کی تعداد میں ہر سال 8 سے 10 فیصد کا اضافہ ہورہا ہے اورملک میں اس موذی مرض کی وجہ سے ہر سال ایک لاکھ 5ہزار سے زائد افراد موت کا شکار ہو رہے ہیں جنہیں بروقت تشخیص اور طبی سہولیات کی فراہمی یقینی بنا کر موت کے منہ میں جانے سے بچایاجاسکتاہے۔
فیصل آبادمیڈیکل یونیورسٹی اورپینم کینسر ہسپتال فیصل آباد کے ماہرین طب نے بتایاکہ پاکستان میں کینسر کے مریضوں کی تعداد ہر سال 8 سے 10 فیصد بڑھ رہی ہے نیز ہیپا ٹائٹس بی اور سی کے ایسے مریض جن کا بروقت علاج نہیں ہوپاتا وہ بھی زیادہ ترکینسر کا شکار ہو جاتے ہیں۔
انہوں نے بتایاکہ پاکستان میں اس موذی مرض کی وجہ سے ہر سال ایک لاکھ 5ہزار سے زائد ادفراد موت کا شکار ہو رہے ہیں جن میں نصف تعدادکے قریب یعنی 40 ہزارسے زائد ایسی خواتین ہیں جو چھاتی کے کینسر کی وجہ سے لقمہ اجل بنتی ہیں۔
انہوں نے مزید بتایا کہ ملک میں اس وقت بھی کینسر کے مریضوں کی تعداد تقریباً15 لاکھ سے زائد ہے جنہیں شعور وآگاہی فراہم کرنا ضروری ہے۔انہوں نے بتایا کہ کینسر کی بر وقت تشخیص اور باقاعدہ علاج سے مریض کی مکمل صحت یابی ممکن ہے۔
