لاہور (رپورٹنگ آن لائن)صوبائی وزیرصحت خواجہ سلمان رفیق نے حلقہ پی پی 153کی یوسی 148میں صاف ستھراپنجاب پراجیکٹ کے حوالے سے منعقدہ تقریب میں بطورمہمان خصوصی شرکت کی۔
سی ای او لاہور ویسٹ مینجمنٹ کمپنی بابر دین،ڈپٹی سی ای او ذوالقرنین، یوسی چیئرمین میاں عرفان،آغاعلی رضا،وائس چیئرمین حافظ علیم مغل،رفعت،اخلاق شاہ اور اہل علاقہ نے کثیرتعدادمیں شرکت کی۔ صوبائی وزیرصحت خواجہ سلمان رفیق نے اس موقع پر ایل ڈبلیوایم سی کے عملہ کے درمیان ماڈل رکشوں کی تقسیم بھی کی اور صاف ستھراپنجاب کی مہم کی قیادت بھی کی۔
صوبائی وزیرصحت خواجہ سلمان رفیق کا تقریب کے شرکا ء سے اپنے خطاب میں کہاکہ حلقہ پی پی 153کی یوسی 148میں صاف ستھر پنجاب اپراجیکٹ کے تحت مہم کا باقاعدہ اور زبردست آغازکردیاگیاہے۔وزیراعلیٰ پنجاب مریم نوازشریف کی جانب سے شروع کئے گئے صاف ستھراپنجاب پراجیکٹ کو ہر صورت کامیاب بنائیں گے۔صاف ستھرا پنجاب اپراجیکٹ کو صوبہ بھرکی تمام یونین کونسلزکی سطح تک پھیلایاگیاہے۔
خواجہ سلمان رفیق نے کہاکہ پاکستان ہمارا گھرہے اور اس کو صاف ستھرارکھنے کی بھی ذمہ داری ہماری ہے۔دین اسلام نے صفائی کو نصف ایمان قراردیاہے۔آج گھرگھرجاکر صفائی ستھرائی کا پیغام پہنچارہے ہیں۔صوبائی وزیرصحت خواجہ سلمان رفیق نے کہاکہ حلقہ پی پی153میں سیوریج،پینے کے صاف پانی اور صفائی ستھرائی کے مسائل کو ترجیحی بنیادوں پر حل کروارہے ہیں۔تاج پورہ،ہربنس پورہ اور بٹ چوک کے علاقہ مکینوں کیلئے بھی آسانیاں پیداکی جارہی ہیں۔عوام کے تعاون کے بغیر صاف ستھراپنجاب پراجیکٹ کبھی کامیاب نہیں ہوسکتا۔
خواجہ سلمان رفیق نے کہاکہ وزیراعلیٰ پنجاب مریم نوازشریف نے محکمہ صحت اور محکمہ ایمرجنسی سروسزپنجاب کا قلمدان سونپاہے۔محکمہ داخلہ اور ڈیزاسٹرمینجمنٹ کی سب کمیٹیوں میں بطورچیئرمین فرائض سرانجام دے رہا ہوں۔مسلم لیگ (ن)کی حکومت نے اقتدارمیں آکرہمیشہ عوام کی فلا ح و بہبودکیلئے کام کیا ہے۔صوبائی وزیرصحت خواجہ سلمان رفیق نے صاف ستھرا پنجاب پراجیکٹ کی کامیابی کیلئے صوبائی وزیر محکمہ بلدیات ذیشان رفیق اور سیکرٹری بلدیات میاں شکیل کی کاوشوں کو سراہا۔
