کراچی (رپورٹنگ آن لائن)ترجمان سندھ حکومت سعدیہ جاوید نے کہا ہے کہ جہاں جماعتِ اسلامی نے کام نہیں کیا، وہاں جیالے میئر نے کام کر کے دکھایا۔
سندھ حکومت کی ترجمان سعدیہ جاوید نے امیرِ جماعتِ اسلامی حافظ نعیم الرحمن کی پریس کانفرنس پر ردِعمل دیتے ہوئے کہا کہ سارا دن سیاسی جماعتوں پر الزامات لگانے والے گلگت بلتستان میں اتحادی بن جاتے ہیں اور سارا دن پیپلز پارٹی پر تنقید کرنے والے آج صدر زرداری سے ہی مطالبات کر رہے ہیں۔
انہوں نے کہا کہ صدر زرداری نے ہمیشہ پاکستان کھپے کا پیغام دیا اور آج بھی ان کا موقف یہی ہے، وہ چاہتے ہیں کہ تمام سیاسی جماعتیں، ادارے مل کر ترقی اور استحکام دیں۔ترجمان سندھ حکومت نے سوال کیا کہ آمروں کے ادوار میں اقتدار کے مزے لوٹنے والے کس منہ سے ہمیں بی ٹیم کہہ رہے ہیں؟
سعدیہ جاوید نے کہا کہ عید الاضحی پر صفائی کے انتظامات سب کے سامنے ہیں، سالڈ ویسٹ کی گاڑیوں پر اپنے جھنڈے لگانے اور کھالیں جمع کرنے والی جماعتِ اسلامی کو کارکردگی نظر نہیں آتی، عوامی خدمت کے بجائے کھالوں کے پیچھے لگنے والوں کو اپنا نظام اور ترجیحات بدلنے کی ضرورت ہے۔ترجمان سندھ حکومت کہا کہ سالڈ ویسٹ بورڈ نے 3 دنوں میں 1 لاکھ 70 ہزار ٹن سے زائد آلائشیں اٹھائیں۔
