لاہور(رپورٹنگ آن لائن )لاہور ہائیکورٹ میں 27 ویں آئینی ترمیم کے خلاف درخواست دائر کر دی گئی۔
منیر احمد اور میاں شبیر اسماعیل سمیت وکلا ء کی جانب سے ترامیم کو چیلنج کرتے ہوئے موقف اپنایا گیا کہ ترامیم آئین کے بنیادی ڈھانچے سے متصادم ہیں۔درخواست گزاروں نے ترامیم کو 1973 کے آئین کی روح کے بھی منافی قرار دیتے ہوئے موقف اپنایا کہ سپریم کورٹ کا اصل اختیار ختم کر کے وفاقی آئینی عدالت کو اوپر بٹھا دیا گیا۔
سپریم کورٹ کی حیثیت کمزور ہونے اور عدلیہ کی آزادی متاثر ہونے کا اندیشہ ہے، موجودہ اسمبلی حقیقی آئین ساز اسمبلی نہیں، اسے اتنی بڑی ترامیم کا اختیار حاصل نہیں۔درخواست میں مزید کہا گیا ہے کہ ترامیم اسلامی دفعات، عدالتی خودمختاری اور بنیادی حقوق کے خلاف ہیں۔
