لاہور 24نومبر(ہیلتھ ڈیسک سے) ینگ نیوروسرجن فورم پاکستان کے انتخابات مکمل،پنجاب انسٹیوٹ آف نیورو سائنسز کے ڈاکٹر اسد شاہ جنرل سیکٹری منتخب ہو گئے۔ ڈاکٹر خضر حیات جوائنٹ سیکرٹری، ڈاکٹر جہانزیب فنانس سیکرٹری اور ڈاکٹر واجد انفارمیشن سیکرٹری کی ذمہ داریاں نبھائیں گے۔ انتخابات کا عمل 37 ویں سالانہ نیشنل نیوروسرجری کانفرنس میں ہوا،جس میں شعبہ نیورو سرجری سے وابستہ ماہرین کثیر تعداد میں موجود تھے۔
میڈیا سے گفتگو میں نو منتخب جنرل سیکرٹری ڈاکٹر اسد شاہ نے کہا ”ہمارا مقصد پاکستان میں نیوروسرجری کی تربیتی معیار کو بہتر بنانا ہے۔ ہم اپنے نوجوان نیوروسرجنز کو بہترین تربیت فراہم کرنے کے لیے پرعزم ہیں اور ان کی پیشہ ورانہ ترقی میں ان کی مدد کریں گے۔”
”انہوں نے مزید کہا، ”ملک بھر میں ورکشاپس اور سیمینارز کا انعقاد کیا جائے گا تاکہ نوجوان نیوروسرجنز کو تجربہ کار ماہرین سے سیکھنے اور اپنے ہنر کو بہتر بنانے کا موقع ملے۔
” ڈاکٹر اسد شاہ نے امید ظاہر کی کہ یہ اقدامات نیوروسرجری کے شعبے میں نمایاں ترقی کا سبب بنیں گے اور ملک بھر میں مریضوں کے علاج کے نتائج میں بہتری آئے گی۔نئے منتخب عہدیداروں نے نیوروسرجنز کے درمیان تعاون اور علم کے تبادلے کی اہمیت پر زور دیا اور ینگ نیوروسرجن پاکستان کے کردار پر روشنی ڈالی۔ ان کا کہنا تھا کہ تنظیم نوجوان نیوروسرجنز کے لیے ایک مضبوط پلیٹ فارم فراہم کرے گی تاکہ وہ اس شعبے میں اپنی صلاحیتوں کا لوہا منوا سکیں۔
