واشنگٹن (رپورٹنگ آن لائن)ایران اور امریکہ کے درمیان تنازع ختم کرنے کے لیے اب تک کوئی حل نہ نکلنے کے بعد، جبکہ یہ لڑائی آٹھویں ماہ میں داخل ہو چکی ہے، امریکی نائب صدر جے ڈی وینس نے کہا کہ واشنگٹن جوہری معاملے پر تہران سے حتمی یقین دہانی چاہتا ہے۔وینس نے اتوار کو انٹرویو دیتے ہوئے کہاکہ ہم ایرانیوں سے حتمی اور پختہ یقین دہانی حاصل کرنا چاہتے ہیں کہ وہ اپنے جوہری پروگرام کو دوبارہ تعمیر نہیں کریں گے۔انہوں نے یہ بھی کہا کہ ایران کے ساتھ تنازع ختم ہونے پر امریکہ سمیت دنیا بھر میں ایندھن کی قیمتوں میں کمی آئے گی۔
امریکی نائب صدر جے ڈی وینس نے اس بات پر زور دیا کہ امریکہ نے ایران کے جوہری پروگرام کو تباہ کرکے وہاں فیصلہ کن کامیابی حاصل کی ہے۔تاہم انہوں نے کہا کہ ایران کو اپنی جوہری صلاحیتیں دوبارہ بحال کرنے سے روکنے اور توانائی کی عالمی فراہمی کے بحران سے بچنے کے لیے جنگ جاری رہنی چاہیے۔وینس نے کہاکہ میں سب سے پہلے یہ تسلیم کروں گا کہ ایندھن کی قیمتیں بہت زیادہ ہیں، لیکن اگر امریکی بحریہ آبنائے ہرمز کے راستے تیل اور گیس کی ترسیل جاری نہ رکھتی تو یہ قیمتیں تین گنا زیادہ ہوتیں۔
