ایبٹ آباد(رپورٹنگ آن لائن)کامسیٹس یونیورسٹی ایبٹ آباد کیمپس نے اپنے دو سالہ ایم بی اے پروگرام کے دوبارہ آغاز کا اعلان کردیا۔ اس سلسلے میں ایچ ای سی اور دیگر اداروں سے ضروری اجازت نامے حاصل کرلیے گئے ہیں۔
ڈیپارٹمنٹ آف مینجمنٹ سائنسز کے زیر اہتمام اس انتہائی اہم پروگرام میں سیشن 2020کے لئے داخلوں کے شیڈول کا اعلان کرتے ہوئے بتایا گیا ہے کہ اس پروگرام میں آن لائن فارم پُر کرنے کی آخری تاریخ15اگست 2020مقرر کی گئی ۔
16اگست سے ٹیسٹ شروع ہو گے اور داخلہ حاصل کرنے والے کامیاب اُمیدواروں کی اس سیشن کی کلاسز کاآغاز 14ستمبر سے ہوجائے گا۔ ایم بی اے پروگرام میں16سالہ تعلیم مکمل کرنے والے متعلقہ شعبوں بشمول بزنس ایڈمنسٹریشن ، کمپیوٹر سائنس، آئی ٹی ، اکنامکس، انجینئرنگ ، نیچرل سائنس، پبلک اینڈمنسٹریشن اینڈ پالیسی، ڈویلپمنٹ سٹڈیز وغیرہ کے طلبہ داخلہ لینے کے لئے اہل ہوں گے ۔
اس پروفیشنل ڈگری کا سکوپ زندگی کے تمام شعبہ جات کا احاطہ کیے ہوئے ہے۔ اس ایم بی اے پروگرام میں خاص طور پر لیڈرز ،منیجرز، اور انٹر پرنیورزکی تیاری پر توجہ دی جائے گی ۔ اس سلسلے میں ایم بی اے کے داخلہ کے حصول کے خواہش مند طلباء نے اس پروگرام کے اعلان کو خوش آئند قرار دیا اور کہا کہ وہ سالوں سے اس پروگرام کے اجراء کا انتظار کررہے تھے۔
کامسیٹس یونیورسٹی کے اس نئے دو سالہ ایم بی اے پروگرام میں داخلہ کی اہلیت کو اس طرح مقرر کیا گیا ہے کہ 16سالہ تعلیم مکمل کرکے پروفیشنل ڈگری حاصل کرنے والا ہر ہونہار طالب علم اس پروگرام میں داخلہ کے لئے اپلائی کرسکتا ہے ۔
واضح ہے کہ کامسیٹس یونیورسٹی ملک بھر کے تعلیمی اداروں میں ایک نمایاں ادارہ ہے ۔کامسیٹس ایبٹ آبادکیمپس میں اس وقت 560خواتین و حضرات جن میں سے ہر ایک اپنے شعبہ میں سند حیثیت رکھتا ہے ، بحیثیت فیکلٹی ممبران خدمات سرانجام دے رہے ہیں جن میں 200سے زائدپی ایچ ڈی پروفیسرز بھی شامل ہیں ۔
اس ادارے کے12شعبہ جات میں 26گریجویٹ اور 17انڈر گریجویٹ پروگرامز چل رہے ہیں جن میں 6000سے زائد طلبہ و طالبات زیر تعلیم ہیں۔
