لاہور( رپورٹنگ آن لائن)پنجاب میں قومی انسداد پولیو مہم کا آغاز تین فروری سے ہوگا،لاہور، راولپنڈی،فیصل آباد میں مہم 9 فروری جبکہ دیگر اضلاع میں 7 فروری تک جاری رہے گی،مہم کے دوران پنجاب میں 2 کروڑ 33 لاکھ بچوں کو ویکسیئن کے قطرے پلانے کا ہدف مقرر کیا گیا ہے ۔
انسداد پولیو مہم کے سلسلے میں انتظامات کا جائزہ لینے کیلئے چیف سیکرٹری پنجاب زاہد اختر زمان کی زیر صدارت سول سیکرٹریٹ میں اجلاس ہوا۔فیصلہ کیا گیا کہ سکولوں میں امتحانات کے پیش نظر انسداد پولیو مہم میں محکمہ تعلیم سے کم سے کم عملہ کی خدمات لی جائے گی۔ چیف سیکرٹری نے انسدادپولیو مہم موثر اور کامیاب بنانے کی ہدایت کرتے ہوئے کہا کہ ماحولیاتی نمونوں میں پولیو وائرس کی موجودگی تک خطرہ برقرار ہے،ڈپٹی کمشنرز انسداد پولیو مہم کی خودنگرانی کریں۔
انہوں نے کہاکہ پولیو کے خاتمے کی کوششوں میں مطلوبہ نتائج حاصل کرنے کیلئے جدید ٹیکنالوجی کو بروئے کار لایا جائے، ڈیجیٹائزیشن کے ذریعے مائیکرو پلانز کو بہتر بنایا جا سکتا ہے۔ چیف سیکرٹری ڈپٹی کمشنرز کو ہدایت کی کہ ٹرانزٹ پوائنٹس پر ویکسیئن کے قطرے پلانے کیلئے خصوصی اقدامات کئے جائیں۔
اجلاس میں سیکرٹری پرائمری ہیلتھ نادیہ ثاقب نے تفصیلی بریفنگ دی اور بتایا کہ انسداد پولیو مہم کیلئے 2654 ٹرانزٹ، 4888 فکسڈ، 85 ہزار موبائل ٹیمیں تشکیل دی گئی ہیں۔اجلاس میں متعلقہ محکموں کے حکام، پولیو کے خاتمے کیلئے کام کرنے والے بین الاقوامی اداروں کے نمائندوں نے اجلاس میں شرکت کی جبکہ تمام ڈویژنل کمشنرز اور ڈپٹی کمشنرز ویڈیو لنک کے ذریعے شریک ہوئے.
