لاہور 14اگست(زاہد انجم سے)پرنسپل پوسٹ گریجویٹ میڈیکل انسٹی ٹیوٹ پروفیسر ڈاکٹر محمد الفرید ظفر نے لاہور جنرل ہسپتال میں سبز ہلالی پرچم لہرانے کے بعد کینسر میں مبتلا زیر علاج بچوں کے پاس وارڈ میں پہنچ گئے۔ انہیں جشن آزادی کی خوشی میں شامل کرنے کیلئے گفٹ دئیے۔ نونہالوں کے ساتھ تصاویر بنوائیں۔ اس موقع پر لواحقین سے گفتگو کرتے ہوئے پروفیسر الفرید ظفر کا کہنا تھا کہ سرطان کے مرض میں مبتلا بچوں کے ساتھ جشن آزادی کے لمحات گزار کر دلی سکون ملا ہے اور گزارے ہوئے یہ لمحات میری زندگی کا قیمتی اثاثہ ہیں۔ اس موقع پر پروفیسر صاحبان، ایم ایس ڈاکٹر فریاد حسین، ڈاکٹرز اور ہیلتھ پروفیسنلز بھی موجود تھے۔ یوم آزادی کے موقع پر جنرل ہسپتال میں خصوصی تقریب کا انعقاد کیا گیا جس میں کیک کاٹنے کے علاوہ ڈاکٹرز، نرسنگ آفیسرز اور پیرا میڈکس نے ایک دوسرے کو مبارکباد دی اور خوشی کا اظہار کیا جبکہ پروفیسر الفرید ظفر نے بہترین کارکردگی پر ڈاکٹرز، نرسنگ آفیسرز، پیرا میڈکس اور میڈیکل سٹوڈنٹس میں شیلڈز تقسیم کیں۔
اس موقع پر خطاب کرتے ہوئے امیر الدین میڈیکل کالج کے پرنسپل پروفیسر محمد الفرید ظفر نے کہا ہے کہ نئی نسل کو تحریک پاکستان کی قربانیوں سے آگاہ کرنا وقت کا اہم ترین تقاضا ہے۔ انہوں نے کہا کہ یوم آزادی کے موقع پر طلبا و طالبات،نرسنگ سٹاف او ر پیرامیڈیکس کو اُن لاکھوں قربانیوں کے متعلق آگاہ کرنا ضروری ہے جن کے باعث پاکستان کا خطہ معرض وجود میں آیا، ایم ایس ڈاکٹر فریاد حسین نے کہا کہ ہمارے بزرگوں کا خون اس وطن عزیز کی بنیادوں میں شامل ہے اور نئی نسل کو زیادہ سے زیادہ دلجمعی اور قومی لگن کے ساتھ اس پاکستان کی حفاظت کا بیڑہ اٹھانا چاہیے جو اسلام کے نام پر معرض وجود میں آیا۔فیکلٹی ممبران، پرنسپل نرسنگ کالج روبینہ انعام، ڈپٹی چیف نرسنگ سپرنٹنڈنٹ زمرد خورشید، ڈاکٹر لیلیٰ شفیق، ڈاکٹر جاوید ممتاز،خالدہ تبسم اور رانا پرویز نے بھی خطاب کیا۔
جنرل ہسپتال کے سبزہ زار میں منعقد ہونے والی پرچم کشائی کی اس تقریب میں زیر علاج مریضوں نے بھی سبز ہلالی پرچم تھامے دیگر شرکاء تقریب کے ساتھ مل کر پاکستان کا مطلب کیا ”لا الہ لا اللہ“۔پاکستان زندہ باد،کے فلک شگاف نعرے لگائے۔ نرسنگ طالبات نے جشن آزادی کی خوشی میں سبز ڈوپٹے اوڑ ھ کر ماحول کووطن کی محبت کے مقدس رنگ میں رنگ دیا۔ تقریب میں نرسنگ طالبات نے ترنم کے ساتھ قومی ترانہ پڑھا جبکہ حاضرین نے بھی یک زبان ہوکر ان کا ساتھ دیا۔ اس موقع پر ایک ملی نغمے کی دھن پر سبز ہلالی پرچم کو سلامی دی گئی۔ اس موقع پرجنرل ہسپتال انتظامیہ نے مریضوں میں مٹھائی و تحائف تقسیم کئے اور ملکی ترقی، خوشحالی اور استحکام کیلئے خصوصی دعا کرائی گئی۔
تقریب میں نرسنگ طالبات نے ملی نغمے پیش کئے اور اس عزم کا اعادہ کیا کہ وہ دل جمعی کے ساتھ اعلیٰ تعلیم حاصل کرکے ملکی تعمیر و ترقی میں اپنا اہم کردار ادا کریں گی۔پروفیسرمحمدالفرید ظفر نے ڈاکٹرز، نرسز اور پیرا میڈیکل سٹاف پر زور دیا کہ وہ دکھی انسانیت کی خدمت کیلئے کوئی دقیقیہ فروگزاشت نہ کریں کیونکہ بابائے قوم ان سے یہی توقع وابستہ کرتے تھے اور ہمیں اُن کی توقعات پر پورا ترنا ہے۔
