رباط (رپورٹنگ آن لائن) فلسطین کے وزیر ٹرانسپورٹ طارق حسینی زاراب اور وفاقی وزیر مواصلات، نجکاری و سرمایہ کاری بورڈ عبدالعلیم خان کے مابین مراکش میں تفصیلی ملاقات ہوئی جس میں وفاقی وزیر عبدالعلیم خان نے فلسطینی وزیر سے پاکستانی عوام کی طرف سے خیر سگالی کے بھر پور جذبات کا اظہار کرتے ہوئے کہا کہ پاکستانی عوام کے دل اپنے فلسطینی بھائیوں کے ساتھ دھڑکتے ہیں.
پاکستان فلسطین کی اخلاقی سفارتی اور ہر طرح کی مدد جاری رکھے گا اور ہر پاکستانی شہری کو وہاں ڈھائے جانے والے مظالم پر دلی دکھ اور رنج ہے جس کی جتنی بھی مذمت کی جائے کم ہے۔ وفاقی وزیر و صدر استحکام پاکستان پارٹی عبدالعلیم خان نے اس امید کا اظہار کیا کہ فلسطینیوں کی جدوجہد ضرور رنگ لائے گی اور انہیں آزاد ریاست کا حق مل کر رہے گا۔
فلسطین کے وزیر ٹرانسپورٹ طارق حسینی زاراب نے پاکستانی حکومت کے تعاون پر شکریہ ادا کرتے ہوئے وفاقی وزیر عبدالعلیم خان کے جذبات کو سراہا، انہوں نے کہا کہ اللہ تعالیٰ فلسطین کو جلد آزادی نصیب کرے گا۔ چوتھی گلوبل منسٹریل کانفرنس کے اختتامی سیشن میں بنگلہ دیش کے وزیر صنعت و پیداوار عادل الرحمٰن خان عمان کے ڈپٹی منسٹر بریگیڈئیر جنرل علی الفلاحی اور مالدیپ کے وزیر ٹرانسپورٹ ایم آمین نے علیحدہ علیحدہ وفاقی وزیر عبدالعلیم خان اور ان کے وفد سے ملاقات کی.
جس میں بین الملکی تعاون بالخصوص ٹرانسپورٹ اور مواصلات کے شعبے میں ایک دوسرے کے تجربات سے مستفید ہونے پر گفتگو ہوئی اور مراکش میں ہونے والی چوتھی گلوبل منسٹریل کانفرنس برائے روڈ سیفٹی کو بالخصوص ترقی پذیر ممالک کے لئے زیادہ سودمند قرار دیا گیا۔ وفاقی وزیر عبدالعلیم خان نے غیر ملکی وزراء سے گفتگو کے دوران بتایا کہ پاکستان کے چوبیس کروڑ کے عوام کے ملک میں چالیس فیصدذرائع مواصلات میں مزید بہتری لانے کی گنجائش موجود ہے۔ہم دیگر ممالک سے بی ٹو بی اور جی ٹو جی دونوں انداز میں باہمی سرمایہ کاری اور تعاون چاہتے ہیں، ان حالات میں بھی پاکستان کی موٹرویز اور شاہرات ماضی کے مقابلے میں بہتری کی طرف گامزن ہیں۔
وفاقی وزیر عبدالعلیم خان نے بتایا کہ ٹریفک میں بہاؤ میں اضافے کے باوجود حادثات میں کمی اور ریونیو میں اضافہ کر رہے ہیں اور سفر کو محفوظ بنانے کے لئے جدید تقاضوں سے ہم آہنگ پالیسیوں پر عمل پیرا ہیں۔ غیر ملکی وزرائ اور وفاقی وزیر عبدالعلیم خان نے مراکش کی تین روزہ کانفرنس کو خوش آئند قرار دیا اور ایک دوسرے کے لئے کامیابی کی خواہشات اور خوشگوار یادوں کے ساتھ واپسی کی توقع کا اظہار کیا۔
