اسلام آباد(رپورٹنگ آن لائن)وزیراعظم شہباز شریف نے کہا ہے کہ فلسطین اور لبنان کے مسلمانوں کو مصیبت میں تنہا نہیں چھوڑیں گے،موسم سرماکیلئے اسرائیلی ظلم و جارحیت کے شکار مسلمان بہن بھائیوں کیلئے جلد مزید 3ہزار خیمے اور 12ہزار کمبل بھیجیں گے۔
جمعہ کووزیر اعظم محمد شہباز شریف کی زیر صدارت فلسطین اور لبنان میں پاکستان کی جانب سے بھیجی جانے والی امداد کے حوالے سے جائزہ اجلاس ہوا۔اجلاس میں وزیراعظم نے کہا کہ تاریخ گواہ ہے کہ 20صدی میں عالمی جنگوں کی بڑی وجہ عالمی قوتوں کی جانب سے ایسے تنازعات پر خاموشی تھی، دن بدن بڑھتی ہوئی اسرائیلی جارحیت پورے خطے کو اپنی لپیٹ میں لے رہی ہے،عالمی قوتیں اسرائیل کو نہتے لوگوں کی نسل کشی سے فورا روکیں۔
انہوں نے کہاکہ حکومتی اقدامات کے ساتھ ساتھ عوام سے بھی اپنے فلسطینی بہن بھائیوں کی مدد کی اپیل ہے،صہیونی ظلم و استبداد کے شکار نہتے فلسطینیوں اور لبنانیوں کی مدد کیلئے حکومتِ پاکستان نے امدادی فنڈ قائم کر دیا ہے، فلسطین و لبنان کے مسلمانوں کو مصیبت میں اکیلا نہیں چھوڑیں گے،پاکستانی عوام بالخصوص صاحب ثروت افراد بڑھ چڑھ کر اس فنڈ میں عطیات جمع کروائیں۔
شہباز شریف نے کہا کہ پاکستان موسم سرما کیلئے فلسطین اور لبنان میں اسرائیلی ظلم و جارحیت کے شکار مسلمان بہن بھائیوں کیلئے جلد مزید 3ہزار خیمے اور 12ہزار کمبل بھیجے گا جبکہ اشیائے خورو نوش اور ادویات بھی بھیجی جارہی ہیں، اسرائیل کا فلسطینیوں تک امداد میں رکاوٹ پیدا کرنا تشویشناک اور قابل مذمت ہے، فلسطین اور لبنان کے ہمسایہ ممالک میں پاکستانی سفیر پاکستان کی جانب سے بھیجی جانے والی اشیا کی ترسیل کو تیز اور یقینی بنانے میں اپنا موثر کردار ادا کریں۔پاکستان اور بیرون ملک مقیم پاکستانی IBAN:PK11SBPD0000001111114292،01111114292 :ID Raast میں عطیات جمع کروا کر اپنے فلسطینی اور لبنانی بہن بھائیوں کی مدد میں حکومت کا ساتھ دیں۔
٭٭٭٭٭
