اسلام آباد (رپورٹنگ آن لائن)سینیٹر فیصل واوڈا نے جمعیت علماء اسلام کے سربراہ مولانا فضل الرحمان سے ان کی رہائش گاہ پر ملاقات کی جس میں اہم امور پر تبادلہ خیال کیا گیا۔ذرائع نے بتایا کہ ملاقات میں مدارس کی رجسٹریشن سے متعلق بل پر تبادلہ خیال کیا گیا، ملاقات میں ملکی مجموعی سیاسی صورتحال پر بھی تبادلہ خیال کیا گیا۔
سینیٹر فیصل واوڈا نے کہا کہ بانی پی ٹی آئی کی جان کو جو خطرات ہیں اْس پر فضل الرحمان سے بات کی ہے، مدارس رجسٹریشن کے بل میں جو تاخیر ہوئی ہے اْس پر بھی مولانا سے بات کی ہے۔مولانا فضل الرحمان سے ملاقات کے بعد میڈیا سے گفتگو کرتے ہوئے فیصل واوڈا نے کہا کہ مولانا فضل الرحمان سے 26ویں ترمیم پر بات ہوئی، ان کا نفرت کی سیاست کو ختم کرنے میں اہم کردار رہا ہے۔
فیصل واوڈا نے کہا کہ کے پی کے میں جے یو آئی کے مینڈیٹ کے ساتھ بہت زیادتی کی گئی ہے، نفرت کی سیاست کے خاتمے کیلئے سب کے پاس جانے کو تیار ہوں، مذاکرات سے بڑے سے بڑے مسائل حل ہوتے ہیں، بڑی بڑی جنگیں بھی مذاکرات کے ذریعے ختم ہوتی ہیں، ہر اسٹیک ہولڈر کے پاس جاؤں گا۔انہوں نے کہا کہ بانی پی ٹی آئی کی جان کو اْن کی بیگم اور حواریوں سے خطرہ ہے، میرا ایجنڈہ بانی پی ٹی آئی کی جان بچانا ہے۔
فیصل واوڈا نے کہا کہ مولانا فضل الرحمان سے میرا تعلق سیاست میں آنے سے پہلے سے ہے، جے یو آئی کے ساتھ 26ویں ترمیم کے معاملے پر کوئی ہاتھ نہیں ہوا، فارم 45 کی بات کرتے ہیں، کے پی میں پی ٹی آئی نے مولانا کیساتھ کیا کیا؟انہوں نے کہا کہ پرو اسٹیبلشمنٹ بھی ہوں اور پروجوڈیشری بھی ہوں، دھرنے میں ہمارے جوان شہید ہوئے۔
