اسلام آباد (رپورٹنگ آن لائن)سیلابی صورتحال کے پیشِ نظر پنجاب کے 9 اضلاع میں پولیو مہم مؤخر کردی گئی، ملک کے دیگر حصوں میں پولیو مہم یکم ستمبر سے شروع ہوگی۔
نیشنل ایمرجنسی آپریشنز سینٹر ( این ای او سی ) نے بتایا کہ سیلاب کی صورتحال کے پیش نظر پنجاب کے 9 اضلاع لاہور، شیخوپورہ، قصور، اوکاڑہ، گوجرانوالہ، سیالکوٹ، ملتان، مظفرگڑھ اور بہاولپور میں پولیو مہم موخر کردی گئی ہے۔این ای او سی کے مطابق راولپنڈی، اٹک، میانوالی، فیصل آباد میں پولیو مہم شیڈول کے مطابق ہوگی۔
اسی طرح ڈیرہ غازی خان ، راجن پور ور رحیم یار خان میں بھی پولیو مہم شیڈول کے مطابق ہوگی۔این ای او سی کے مطابق ملک کے دیگر حصوں میں پولیو مہم یکم ستمبر سے شروع ہو گی۔این ای او سی کی جانب سے والدین سے اپیل کی گئی ہے کہ مہم کے دوران جب بھی پولیو ٹیم آپ کے دروازے پر آئے ان سے تعاون کریں، اور اپنے 5 سال سے کم عمر بچوں کو پولیو کے قطرے لازمی پلوائیں۔
