کراچی (رپورٹنگ آن لائن)سپیکر سندھ اسمبلی اور پاکستان پیپلزپارٹی کے رہنما آغا سراج درانی جنوری کے دوسرے ہفتے تک جیل میں رہیں گے۔ جمعرات کوسپریم کورٹ میں آغا سراج درانی کی ضمانت کی درخواست پر سماعت ہوئی۔ان کے وکیل نے عدالت کو بتایا کہ آغا سراج درانی نے نیب حکام کو گرفتاری دے دی ہے اوراحتساب عدالت نے آغا سراج درانی کو جیل بھیج دیا ہے۔
درخواست گزار کے وکیل کا کہنا تھا کہ آغا سراج درانی کی وراثتی جائیداد کا درست تخمینہ نہیں لگایا گیا ہے۔جسٹس عمر عطا بندیال نے کہا کہ اس حوالے سے عدالت نیب کو نوٹس جاری کرتی ہے۔ اسپیشل پراسیکوٹر ستار اعوان نے عدالت کو بتایا کہ نیب کی جانب سے جواب بھی جمع کرادیا ہے۔
سپریم کورٹ نے نیب کے جواب کی کاپی آغا سراج درانی کے وکیل کو دینے کی ہدایت کی۔ عدالت نے 2 شریک ملزمان کی عبوری ضمانت میں بھی آئندہ سماعت تک توسیع کردی۔ کیس کی مزید سماعت جنوری کے دوسرے ہفتے تک ملتوی کر دی گئی۔
