اسلام آباد (رپورٹنگ آن لائن)صدر عارف علوی کی جانب سے سرکاری معلومات لیک کرنے والے بدعنوان نیب اہلکار کی سزا برقرار رکھتے ہوئے نیب اہلکار کو کرپشن کیلئے سرکاری معلومات لیک کرنے پر سزا کے خلاف اپیل مسترد کر دی گئی ۔ جار ی اعلامیہ کے مطابق صدر مملکت نے کہاکہ نیب سرکاری راز افشاء کرنے کے کیسز میں ملوث دیگر افسران کے خلاف بھی کارروائی کرے ۔
انہوںنے کہاکہ افسوس کہ انسدادِ بدعنوانی کیلئے ذمہ دار ادارے نیب کے اندر ہی کرپشن کی گئی ۔ جار ی اعلامیہ میں دی گئیں تفصیلات کے مطابق نیب کے گریڈ 16 کے اہلکار ، نعمان اقبال ، نے غیر قانونی طور پر غیر مجاز افراد کو سرکاری معلومات دی ،انکوائری میں جرم ثابت ہونے پر اہلکار کو ”پانچ سال کیلئے نچلی پوسٹ پر تنزلی ” کی سزا دی گئی ،نیب اہلکار نے سزا کے خلاف صدر مملکت کو اپیل دائر کررکھی تھی ،نیب، کراچی نے سورس رپورٹ کی بنیاد پر انکوائری کی ، اپیل کنندہ کے موبائل سے خفیہ ریکارڈ ملا ،نیب اہلکار کے فون کے فرانزک تجزیے میں گفتگو اور دستاویزات سے بھی جرم ثابت ہوا ،نیب نے نعمان اقبال کے خلاف تادیبی کارروائی شروع کرنے کی سفارش کی تھی،انکوائری کمیٹی نے درخواست گزار کو ”بدانتظامی ”اور ”سرکاری راز افشا کرنے”کے الزام میں قصوروار قرار دیا ،نعمان اقبال نے نیب ایمپلائز سروسز رولز کے تحت صدر کو سزا کے خلاف اپیل دائر کی ۔
صدر مملکت نے کہاکہ اہلکار نے فیصلہ کے خلاف کوئی معقول وجہ یا اضافی جواز فراہم نہیں کیا ، ایسے افراد کے لیے پانچ سال کی سزا انصاف نہیں ، سزا مزید سخت ہونی چاہیے تھی۔ صدر مملکت نے کہاکہ نیب معاملے میں ملوث دیگر افسران کا قصور ثابت ہونے پر ملک کو دھوکہ دینے ، امیج خراب کرنے پر سزا دے ۔
٭٭٭٭٭
