مکوآنہ (رپورٹنگ آن لائن)صوبائی وزیر صحت خواجہ سلمان رفیق نے میڈیکل کی تعلیم اور ہسپتالوں کی تعمیر میں نجی سرمایہ کاری کو انتہائی منافع بخش قرار دیا ہے جس سے دنیا اور آخرت دونوں کمائی جا سکتی ہیں۔
عزیز فاطمہ میڈیکل اینڈ ڈینٹل کالج کے دورے کے دوران انہوں نے کالج کے مختلف شعبوں کا معائنہ کیا اور اس کی مجموعی کارکردگی کو سراہا۔ انہوں نے کینال ویوہسپتال کی زیر تعمیر 17منزلہ عمارت کا بھی معائنہ کیا اور کہا کہ دوسرے شعبوں کی طرح صحت کے شعبہ میں بھی ستارہ کے پراجیکٹس انتہائی خوش آئند ہیں جن سے ملک میں ڈاکٹروں کی کمی پر قابو پانے کے ساتھ ساتھ لوگوں کو صحت کی جدید ترین سہولتیں بھی مہیا کی جا سکیں گی۔
اس موقع پر فیصل آباد چیمبر آف کامرس اینڈانڈسٹری کے صدر ریحان نسیم بھراڑہ، ڈاکٹر فرقت عالمگیر، منیجنگ ٹرسٹی میاں محمدادریس، میاں محمد جاوید اقبال، میاں عمران غفور، میاں عبداللہ جاوید، میاں حمزہ بشیر، اعجاز حسین، چیف آپریٹر آفیسر پروفیسر ڈاکٹر محمد سعید، پرنسپل ڈاکٹر غلام عباس شیخ اور آفتاب احمد خاں بھی موجود تھے۔
