لاہور(رپورٹنگ آن لائن ) لاہور جنرل ہسپتال کی 84 نرسیں میڈیکل کے مختلف شعبوں میں سپیشلائزیشن کے کورسز کے لیے منتخب ہو گئی ہیں۔ اس بارے میں ڈپٹی چیف نرسنگ سپرنٹنڈنٹ شازیہ کوثر نے تفصیلات بتاتے ہوئے کہا کہ منتخب شدہ 84 نرسز میں سے 20 پوسٹ آر این (بی ایس سی نرسنگ) کریں گی۔
ان نرسز کے کورس کی مدت دو سال ہے جبکہ ایک سال کے پوسٹ بیسک سپیشلائزڈ ڈپلومہ کے لیے 64 نرسوں کا انتخاب کیا گیا ہے انہوں نے کہا کہ پبلک سیکٹر انسٹیٹیوٹس میں نرسوں کی کپیسٹی بلڈنگ کے لیے ہونے والے ان کورسز پر ان نرسوں کا ایک پیسہ بھی خرچ نہیں ہوگا ۔
سپیشلائزڈ کورس کی تکمیل پر یہ نرسیں نہ صرف مریضوں کے علاج معالجے کا معیار مزید بہتر بنانے میں اپنا موثر کردار ادا کر سکیں گی بلکہ انہیں دوران ملازمت ترقی کے بہتر مواقع بھی میسر آئیں گے۔ شازیہ کوثر نے مزید کہا کہ ہمارے ہیلتھ کیئر سسٹم میں نرسوں کا کلیدی کردار کسی سے ڈھکا چھپا نہیں۔ بالخصوص وبائی امراض پھوٹنے کی صورت میں نرسوں نے ہمیشہ فرنٹ فٹ پر آ کر انسانی جانیں بچائی ہیں۔
فرائض منصبی کی ایسی شاندار ادائیگی اور دکھی انسانیت کی خدمت میں اپنی جانیں تک قربان کرنے والی ان نرسز کا اعلی تعلیم اور ترقی کے مواقع پر پورا پورا حق ہے انہوں نے کہا کہ جنرل ہسپتال کی 84 نرسوں کا اعلی تعلیم کے لیے منتخب ہونا نہ صرف ادارے میں پروفیشنلزم اور اعلی کارکردگی کا ثبوت ہے بلکہ اس سے پرنسپل پروفیسر ڈاکٹر الفرید ظفر کا نرسنگ کا معیار مزید بلند کرنے کا ہدف بھی حاصل ہو رہا ہے۔
